私會情人的情人節。 精選 推薦

　　情人節啱啱過咗，我又見到曾經嘅同學求婚成功，同佢最愛準備踏入人生嘅下一步。不過依個世界唔係真係一男一女喺一齊就大團圓結局，無論係騎牛搵馬又好，難以取捨又好，甚至係搵多個Hea下時間，一拖二甚至三想享齊人之福嘅真係唔少，不論男女。

　　你有冇發現你情人今日淨係陪到你半日？你有冇發現佢十二點出嚟食完個飯睇完三點三就話有時走先，甚至Facebook今日一張相都冇Post過？為咗保密，佢地會用盡方法將「知己」收埋：例如Facebook永遠Share無聊嘢，IG從來唔會擺合照，甚至唔多願意比人知你同佢嘅關係。佢地總會有啲好好嘅理由，好似係好著重私隱啊，兩個一齊開心就得唔洗刻意公開啊，或者想過多排先公開。當一個人可以將一段關係收得咁埋，佢自然可以收埋更多情人，將一樣嘅理由用喺下一個身上，甚至你可能就係嗰個第三者，只係你一直被矇在鼓裡，當正自己係唯一。
　　除咗情人節，其實日常生活佢都會有好多馬腳露出嚟。因為佢冇介紹佢嘅朋友比你識，所以每次佢話約咗人你都唔會知佢約邊個。「我同朋友食飯」、「我同朋友睇戲」、「我同朋友行街」，每次佢有約都會用只會朋友兩個字，你唔好意思追問係邊個，就算你問佢都會同你講「你都唔識」。又或者係成日記錯同你食過邊間，同你講過乜嘢，好多時講到一半見你一頭霧水先發現自己記錯對像，然後又係用「同朋友講過」，「自己冇記性」做理由，然後咀你兩啖廢事你懷疑落去。最可疑當然係電話一到夜晚未必時時有人聽，然後過一排就話行開啊沖涼啊同屋企人講緊嘢咁然後再打返比你。如果我講嘅嘢你發現中哂，Well，我只可以叫你留意下，小心啲。
　　話就話拍拖係兩個人嘅事，但有邊個會唔想同朋友分享搵到愛侶嘅喜悅（即係曬命啦下），唔想放張合照上社交網絡話比人知對方已經係非賣品？如果對方連咁基本嘅安全感都比唔到你，你又覺得同佢一齊好冇真實感，連拖住佢都冇拍拖嘅感覺的話，你有冇諗過自己可能只係一個比人用住先嘅「水泡」？

一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材