男人心目中的溫暖牌。

　　最近天氣凍咗好多，好多人出街都會戴返條頸巾，我最近條「新歡」係喺大阪買嘅雷文克勞頸巾，不過比起由女朋友親手織嘅溫暖牌就差好遠。如果我有女朋友織條頸巾比我，唔好話戴，我淨係望到都覺得暖笠笠。

　　好多人一到咗啲大時大節記念日就會四出搵份禮物比另一半，特別喺情人節直頭好似燒得愈多錢先愈愛你：送花愈多愈愛、食得愈豪愈愛、送禮愈貴愈愛，恨不得你將今個月甚至今年份糧都洗哂落依一日。大家好似忘記咗送禮最緊要心思，而「親手」就係花心思嘅最好證明。無論係織一條頸巾或者整本屬於你地嘅相簿都好，當中嘅價值唔係用錢可以計到，收嗰個人當下嘅驚喜同感動真係筆墨難以形容，就算我話開心過中頭獎都唔過份。戴住條頸巾，睇返大家嘅合照，屬於兩個人嘅回憶一下子返哂嚟，依種閃光真係冇邊幾個頂得順。眼見男朋友為咗情人節準備得咁辛苦，花啲心思整件禮物回禮當多謝佢都唔過份吖係咪？
　　好多時男人唔需要自己女人用幾多錢去買嘢比自己，佢地需要嘅只係你願意為咗佢付出。煮一餐飯嘅時間、織條頸巾嘅時間、將啲相剪剪貼貼嘅時間，男人要嘅安全感未必要你時時都陪住佢，而係知道你願意為佢付出小小時間，花多小小心思就好足夠。好多女人唔明點解咁多男人咁著緊女朋友識唔識煮飯，但對男人嚟講一返到屋企就有住家飯食其實有一種莫明感動，單單從好多男人都會影低女朋友煮嘅嘢食放上Facebook放閃就知餐飯有幾重要。佢唔介意你煮得唔多好食，個湯落得太多鹽又或者雞翼甚至冇調過味，因為有你嘅愛心喺入面，食嘅飲嘅每一啖都甜到入心。

　　男人心中嘅溫暖牌其實就係任何女朋友願意為自己去試去做嘅嘢。佢地唔介意最後收到嘅實唔實用，美唔美觀，因為佢地喺成品當中搵到你為咁佢嘅滿滿心意。只要擁有你個心男人就別無他求，男人，其實就係咁簡單。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材