《我電話有一首永遠唔敢聽嘅歌》

毛言地 於 13/10/2017 發表 收藏文章
  身為一個懶人,聽歌唔揀就咁開隨機播放係必然嘅事。但有一首歌,我放喺歌單上面一直冇刪,又一直唔敢聽返,一播頭幾秒聽到我就會飛。
 
 
  因為,首歌代表一段回憶。
 
 
  無論超怒哀樂,每段感情都可以搵一首歌概括。或者依首係你同佢喺K房唱嘅第一隻歌、或者你地因為隻歌而相識相戀、又或者分手之後,隻歌嘅歌詞正正代表你嘅心聲。對其它人嚟講係普通不過嘅歌,但對你嚟講就係過去種種經歷嘅濃縮同傷痛。一隻四五分鐘嘅歌令你痛過千次百次,一啲都唔出奇。
 
 
  文字係最好嘅記錄工具,音樂係絕佳嘅情感表達,兩者加埋一齊對一個傷心的人嚟講真係毫無抵抗力。用番人所共知嘅《See You Again》做例子,一首為Paul Walker而寫嘅歌,我相信十年廿年後對佢嘅好友嚟講都依然係代表住悲痛。雖然你唔想再聽,但要將首歌刪走佢又唔捨得,話哂係一段回憶,同你唔刪前度嘅相又唔會睇番一樣——聽落矛盾,但又幾咁現實。
 
 
  捉住過去並冇可能,但留低首歌又好似有一種安慰嘅感覺:唔聽,唔望,但又確確實實存在喺歌單。你可能係想有一日可以同佢再兩個一共用耳筒聽返隻歌,又或者純粹靠隨機聽歌抽中嗰陣嗰幾秒去比自己諗下佢,然後就轉另一隻歌,強迫自己回到現實,甚至你冇諗咁多,就只係單單唔捨得隻歌嘅歌名消失在喺部電話入面。
 
 
  好多時你以為有啲行為好怪,只有自己先會咁傻;但原來依個世界傻人好多,最起碼唔敢刪同前度有關嘅歌,應該大有人在。
 
 
  又或者,可能真係只有我一個。
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地  愛情  失戀  回憶  前度  

留言


請按此登錄後留言。未成為會員? 立即註冊
    快捷鍵:←
    快捷鍵:→