要拍拖,十二點後嘅沙田慘過食屎。

毛言地 於 10/10/2017 發表 收藏文章
  有人話如果同另一半住埋同一區好甜蜜:約出街好快見到面、得閒無事都可以約出嚟散下步、玩夜啲唔怕冇車返屋企、送完女朋友返歸車費又唔貴。係嘅,如果有個同區嘅男女朋友每日大家都好似多咗時間咁,個飯可以再食慢啲,散步可以再行慢啲,幾好。
 
 
  如果你地唔係住喺沙田的話。
 
 
  有人話沙田乜都有,唔洗跨區都可以解決一切,依點我認同啊,最多係冇乜好嘢食咁解。你話晏就同女朋友喺新城市拍拖、夜晚喺商場食埋或者行過少少去宜家、要散步有城門河、有時間睇多場戲,咁樣輕輕鬆鬆過一日有咩唔好?
 
 
  如果大家都係灰姑娘嘅話。
 
 
  睇下香港有幾多人返Shift,有幾多人活躍於十二點後?對佢地嚟講沙田過咗十二點真係一個死城。十二點後通常有咩做?不外符睇戲、宵夜、酒吧,仲有開房。你望下新城市廣場,十點後開始冇飯食冇嘢行,連戲院最後一場戲都係十點左右開始;十一點後除咗河畔一帶叫做仲有人氣,城門河有幾丁友跑下步之外,成個沙田都係死氣沉沉。你話咁咪去開房,做下床上運動都幾好?唔好意思,沙田冇時鐘酒店,要開房麻煩上富豪或者帝都,不過要幾錢落樓?啱啱望咗,富豪六百幾,帝都就二千四⋯⋯
 
 
  戲冇得睇,房唔夠錢開,食宵夜囉。依我目測,河畔一帶十二點後仲做生意嘅食肆有三間:一間食粥、一間食叉燒、一間食雞煲。條女話怕熱、燒味冇興趣、雞煲肥?冇啦,你叫佢返屋企食屎算啦。沙田其他地方唔係話冇嘢食,但就真係得嗰間食嘅開住,尤如漆黑中嘅螢火蟲咁樣囉。
 
 
  食完嘢未眼瞓,想同女朋友摸下杯底甜言蜜語?沙田有一間集團式酒吧等緊你,一間咁大吧。我真係唔明依間嘢點開到周街都係,除咗啤酒冇嘢入到口,又唔係平,唔知有冇人同我一樣係唔會想踏入半步入去飲一杯。望下旺角太子尖沙咀銅鑼灣灣仔中上環,酒吧要情調有情調,要要激情有激情;沙田?我去便利店飲好似仲開心啲,起碼平。
 
 
  或者你住沙田,而你女朋友咁好彩又係沙田友,但次次你地拍拖嘅宵夜睇戲都要去到旺角,然後坐架小晚返嚟,搞到同區拍拖嘅好處冇咗一半。當然啦,如果你地都係運動愛好者,熱愛凌晨喺城門河慢跑,咁沙田都不失為一個好地方嘅,你仲可能見過夜媽媽玩夜跑但跑兩步就冇氣嘅我⋯⋯
 
 
  仲有冇其他區嘅你情況同沙田一樣?有嘅唔介意講出嚟,等沙田友知道一件事。
 
 
  We are not alone.
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地  愛情  拍拖  沙田  

留言


請按此登錄後留言。未成為會員? 立即註冊
    快捷鍵:←
    快捷鍵:→