《當有一日,你連拍拖都懶。》

毛言地 於 03/10/2017 發表 收藏文章
  身邊朋友拍拖嘅拍拖,結婚嘅結婚,而我自從年頭一段好短暫嘅關係之後就再冇聲氣。「你幾時搵返個女朋友」係某次IVE同學出嚟食飯有人問我嘅問題、「成日喺你FB留言個女仔係咪你女朋友」係今晚舊同事問嘅、而自從我同帶過出去同屋企人食飯嘅女朋友分手之後,每次大時大節一大班親人出去食飯,啊婆都會問我「而家有冇女朋友啊」。
 
 
  「未有啊慢慢啦」差唔多係我標準答案,因為我都唔知點同佢地講。
 
 
  拍拖係開心嘅,大家一齊食飯睇戲講下肉麻嘢耐唔耐啪啪啪咁,當多咗一個人喺你生活之中,某程度上你生活係多咗一份動力,每朝鬧鐘一響你就會起身——因為你要WhatsApp佢講早晨甚至傾一陣電話,唔容許你翻瞓。但可能係我自私又或者我真係老啦,晚晚傾兩個鐘電話起跳、無時無刻WhatsApp睇佢比你嘅動物得意片同新假期推介、出一次街影幾廿張相(保守估許)等等,拍拖嗰陣都接受到嘅,但當回復單身之後我就唔想再試同樣嘅經歷。
 
 
  原因?懶掛。
 
 
  係啊,人愈大就愈懶。小學只要我一瞓醒就可以一秒落床開電腦玩線上遊戲帝國;中學暑假上網兩日睇完神鵰俠侶;IVE通頂飲完酒返學夜晚再兼職然後同同事食宵夜都唔覺有問題,簡直係想用盡每日一分一秒。而家?放工出街同朋友食個飯已經係極限,如果要去酒吧分分鐘要一早通知等我儲兩日氣,仲講拍拖等大家收工排一輪隊等位食飯再買飛睇戲?我寧願落街跑半個鐘之後返屋企沖涼,仲可以洗少好多添。
 
 
  以前你見到個有興趣嘅異性你就會用盡方法埋身,拎到電話就打下比人傾多兩嘴搵機會約佢出嚟;而家你連興趣都好似消失埋,就算有女仔WhatsApp你都好,除非你碌緊FB可以順便覆佢,如果唔係連部iPhone都懶得Unlock。有個朋友成日話我對佢愛理不理咁樣,我都唔想㗎。連覆個WhatsApp都咁勞心勞力,仲要我好似以前拍拖咁一日幾百訊息,我諗我暴斃都似。
 
 
  與其話我看破紅塵,不如話我愈嚟愈懶,咩都提唔起勁。
 
 
  你可以話因為我未搵到個有好感嘅女仔,甚至係我已經唔嚮往愛依樣嘢。但我覺得更重要嘅係當一個人嘅生活都已經咁攰嗰陣,再加多個人入自己生活裡面,付出比雙倍更多嘅心力,時時留意佢今日有咩唔同咗,對我嚟講已經唔係享受,係折磨。
 
 
  當有一日,你都有種「點解個個都叫我搵番個,而家咁唔得咩」嘅諗法嗰陣,或者你就已經同我有同一個感嘆。
 
 
  其實,做人真係好攰。
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地  愛情  人生    

留言


請按此登錄後留言。未成為會員? 立即註冊
    快捷鍵:←
    快捷鍵:→