【精神健康 ∙ 自殘】

我每日嘅工作就係同唔同嘅生命相遇。
兩星期前，我遇上一個 20多歲嘅後生女，
佢受思覺失調症困擾咗10年。
佢喺人際關係上亦遇到好多唔開心既事情。

佢每一日放咗工都唔想返屋企，
因為唔想比屋企人見到自己唔開心嘅樣。

佢每一晚去廁所都去好耐，
佢屋企人唔知佢咩事，
會怪責佢用好耐廁所。

但原來佢每一日就係攞住一把界刀入廁所。
佢好想好想做自殘嘅行為，佢痛苦到只能夠不斷喊不斷喊，
直至發洩完，
就帶返個無事發生過嘅面具出嚟。

———

兩個星期後嘅今日
我再見返佢，
佢嘅精神狀態好咗好多，
仲同我講佢冇再暱埋喺廁所喊，
冇再攞界刀入厠所。

———

原來兩星期前，佢搵我地，
因為好想睇返精神科醫生。
我鼓勵佢嘗試同屋企人講自己內心嘅世界，除咗我之外，搵多個屋企人陪佢一齊排期睇醫生。
佢好叻，鼓起咗勇氣同屋企人講。

佢口中嗰個好木納嘅爸爸好安靜咁聽佢講嘢：
「 女女，爸爸好驚訝， 我冇諗過你暱喺廁所咁耐，原來係呢一個原因。
你一定係好唔開心。
我都唔知可以為你做啲乜嘢。
你繼續搵社工，搵醫生幫你，
但我可以聆聽你。
你繼續講啊，你有需要嘅，
你繼續講啊。」

女女好感受到爸爸對自己嘅接納同支持。

所以自從果日，佢冇再驚返屋企， 反而好期待返到屋企可以同爸爸分享自己嘅內心世界。
原本想自殘同暱喺廁所喊嘅行為，不知不覺咁冇咗。

有時我哋唔需要刻意壓抑「問題行為」。「問題行為」背後嘅內在需要得到被關注同關心，行為自然會消失，因為佢嘅存在價值同功用已經無咗。

———
做咗精神復康工作之後，
經常都會有好多無法言語嘅心理爭扎。

特別係一牽涉到有傷害自己，傷害別人意念/行動的時候，便要基於「安全原則」，跳入危機風險評估的思維及進行「保護」措施。

然而，有時這樣做會忽略了他們都是有血有肉有感情的生命。
精神病情緒病復元人士
同樣需要被尊重、渴望被愛、被關注、想擁有希望感、自制感和快樂。#精神健康 #思覺失調 #自殘

＊＊更多分享＊＊
http://www.facebook.com/step.footprint
http://stepfootprint.blogspot.com/
#心理輔導 | #家庭教育 | #選擇性緘默症 | #健康飲食 | #生命觸動