燒燒燒，連甜品都有得燒既串燒店

 作為官塘既街坊，住係同一條街，點都要去試下呢間串燒屋，支持下街坊生意嘛
睇格局，佢有別於一般既街坊鋪。門面大，地方大，尤其樓底高， 成晚都無出現煙霧彌漫既情況枱面放左多款不同調味料，可見店主係幾咁用心經營。除左燒肉汁，仲有自家秘制串燒醬。我最愛的，當然係可以無限添加的孜然粉

餐廳無煙濛濛，多得呢個抽氣扇同爐，非常給力。串燒爐夠哂火力，食物好快熟之餘又唔會燒到出哂煙 放題除左有串燒，仲有網燒同熟食
不論串燒，網燒同熟食既水準都不俗 以前去食放題，對於一早整好既熟食通常都無乜興趣，但呢度既燒雞軟骨， 蝦餅，魚餅都係新鮮整好，熱辣辣， 同平時餐廳單點既質素一樣咁好 串燒以串黎order, 每串都有4舊肉以上，而且仲係大大舊， 唔係碎濕濕， 所以我同女每樣點一串share食都已經飽哂   網燒既食物亦非常出色， 除左靚靚牛肩肉， 個漢堡扒都好juicy好味呀， 有驚喜 爐既火力好好， 無痴網但又好易造到燒既效果。阿女話見到一格格呀


小店仲好貼心咁將雞翼既底部剪開，方便快熟

註： 扇貝係每人送1隻，無得任食，而4人黎的話仲會送甲羅燒架 呢度既串燒係放係爐度自轉架， 一路轉一路燒，火力均勻又唔使理佢。 係咪燒得好靚？ 讚下自己先~XD  串燒既肉大大舊， 仲會每款肉都醃不同味道， 口味多變。

串燒黎講，我最愛腎片， 台灣腸。仲有一串看似肥豬肉但入口超夾超正既豬頸肉。 仲有厚切牛舌加孜然粉，無得輸熟食除左餐紙點既， 仲有是日精選。
呢個茄子推推推， 一定要點呀。 茄子肥美，小店將茄子細心地切開， 燒到咁上下時將蒜蓉推入茄子入面， 入哂味， 超正除左燒物， 雪櫃仲有好多正野 飲品除左大路既罐裝飲品，仲有自家製飲品， 薏米檸檬水酸酸甜甜好開胃， 菊花蜜好清香。 甜度仲減低左， 有益又健康，飲多2杯都無罪惡感呀。

日式前菜同沙律，獨立包裝，乾淨整齊 估唔到仲有好多種醬汁係雪櫃。 阿女攞左蜜糖沾串燒食。好似去左BBQ。 串燒太多肉，即刻食番兜沙律消下膩。 但臨走先發現原來雪櫃好多菜架， 仲有蒜蓉包，蕃薯仔。 Oh No，蝕左,  早知用生菜包串燒， 我可以食多2串嘛

食串燒，甜品當然都要燒下 有燒棉花糖同菠蘿，加埋杯雪糕，即刻變左芭菲呀 要讚下個菠蘿，超甜又juicy,好似金鑽鳳梨咁正呀。


最開心係可以食2.5小時，上菜又快。138cm高既阿女，仲係收小童價  賺哂~XD  特別多謝店員好熱心，見我地一大一細論論盡盡又會幫我地手。 仲好好笑容，又親切， 街坊真係好

串燒屋
觀塘通明街54號地舖

文章只屬個人意見，口味因人而異，只供參考
如要聯絡本人，請電郵至： smonkichi@hotmail.com 
Fanpge : www.facebook.com/smonkichi 
Instagram : https://instagram.com/smonkichi/

Click below for my sharing platform :
* Blogspot * She.com * U Beauty * Beauty Exchange * Beautylife ** We Share * Beauty Qooza * Baby Kingdom * Fanpiece * The Ztyle *

* ESD Life 生活易 *