《冇人有資格笑蒼井空,或者佢老公》

毛言地 於 03/01/2018 發表 收藏文章
  蒼井空結婚,話諗咗好耐先敢同人講,因為怕得唔到大家祝福,怕比人話比人笑。雖然事實證明好多Fans都為佢開心,但諗諗下,其實結婚只要兩位當時人開心就夠,旁人祝福係Bouns,何況冇人有資格對一個三唔識七嘅人結唔結婚說三道四。
 
 
  特別係因為蒼井空最擔心,有關身世嘅問題。
 
 
  做AV女優唔係罪。正當職業又搵到錢,自力更生又唔係犯法嘅人有咩可以指指點點嘅地方?如果你停留緊喺「因為佢比好多人搞過」或者「因為好多男人都睇過佢祼體」,我覺得你真係好天真。出街咁多對情侶,有幾多對大家都係對方嘅初戀,大家嘅肉體只係比一個人見過?早兩日先話香港人平均拍七次拖,我當你每次拍拖得半年,每個星期搞一次嘢,淨係講同男友搞嘢嘅次數都已經係130次。仲未計蘭桂坊一夜情、上網約人開房、或者好似台灣咁一班女仆住去比一班陌生人搞完仲叫人放條片上網覺得刺激啲嘅淫亂派對。你以為你女朋友同你拍拖之前真係未搞過嘢?你以為得AV女優先會性經驗豐富?少年你真係太年輕。
 
 
  冇錯,你身邊嗰個又或者你某啲朋友,性經驗可能比唔少女優更加豐富,試過嘅腸仔可能係以幾多打去計,甚至拍拖嘅同時有幾個SP,只不過係你唔知咁解。比起上嚟,做男女優要Keep住身體檢查,事前事後又會沖涼,可能比飲兩杯打個車輪就直接上房,一除衫就埋牙嘅一夜情仲要乾淨。女人而家愈嚟愈多嘢已經做到男女平等,甚至有啲位男人反而做咗弱小一群。但喺性依方面大家仍然有一個好保持嘅觀念:搞嘅次數愈多,條女愈係隨便,唔係一個好女人。
 
 
  衰啲講句,即係Account成日講嘅貶值。
 
 
  其實如果一個女人唔係瞞住老公男朋友去玩,喺單身嘅時候佢鍾意點玩真係佢嘅自由,就一如男人一樣,何況蒼井空比人搞係工作上需要,甚至連大家口中嘅「濫」都算唔上,我真係諗唔明有咩人有資格去話蒼井空,或者笑佢老公「娶個公廁返嚟」。有咁嘅諗法嘅人你唔好搵女朋友,因為只會累人累己。
 
 
  喺一個咁嘅世界,有一個唔介意世俗眼光都願意陪伴自己一生嘅另一半,其實蒼井空已經比世上大部份女人要幸福。單單係依一點,就已經值得蒼井空好開心好自豪咁同所有人講:我搵到一個真心愛住自己嘅人。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
標籤: 毛言地  女優  蒼井空  愛情  結婚  

留言


請按此登錄後留言。未成為會員? 立即註冊
    快捷鍵:←
    快捷鍵:→