《靠迷信識女仔其實好好用。》

毛言地 於 02/01/2018 發表 收藏文章
  雖然我個人覺得運程依樣嘢係比人尋求心靈安慰甚於本身用途,但「心靈安慰」依四個大字正正就係一眾女生最需要嘅嘢。點解塔羅牌咁受女仔歡迎、點解富婆通常信風水、點解女人開口埋口都要提到緣份?一切都係因為好多佢地覺得一段戀情入面運程係有好大影響。
 
 
  當你喺一個新環境遇到一個新識嘅女仔,最重要一定係搵到大家之間嘅話題,而有關運程嘅話題通常都啱用。運程包括啲咩?塔羅星座生肖掌相面相都算,最簡單你只要問佢係咩星座,然後同佢講今個月運程會點,佢已經會好開心咁同你傾落去。到時你要問佢幾時生日或者有冇拍拖都易於反掌,而且傾得耐咗,自然拎電話號碼都易啲。有人話最討厭嘅就係比一個啱啱識嘅人係咁問問題,好似審犯一樣。但如果你係利用「幫佢睇下運程」嘅理由去問佢嘢,對方唔單止唔會反感,甚至怕你問得太少的話得出嚟嘅結果會唔夠準。運程嘅嘢通常都易學難精,但而家又唔係叫你做大師,是但搵半個鐘Google睇下唔同星座嘅性格已經夠你同佢傾落去;又或者學下睇掌嗰三條事業、生命、愛情線係咩,點算係好點算係壞,已經足以下次你落酒吧捉住女仔隻手慢慢睇。
 
 
  喺運程當中又以星座最多女仔信,獅子係點射手係點你差唔多隨口問個女仔都答到你。了解星座之後你唔止有一個同女仔傾落去嘅話題,甚至可以由佢地鍾意咩星座嘅男仔,又或者佢地自己同咩星座嘅男仔夾而去猜測到佢地心儀嘅類型。如果你本身就係佢地鍾意嘅星座男無疑已經加咗分,就算唔係,你喺佢地面前不經意咁表露出佢地覺得吸引嘅特質,好似細心溫柔之類都可以令佢地心目中對你留下好印像。好膚淺?如果你連咁膚淺嘅印像都比唔到人,又點可以喺日後有機會作進一步了解?特別係如果你遇到一個啱啱失戀嘅女仔,了解星座嘅你對佢而言就尤如一個久違嘅知音人,轉個頭去到晚晚傾電話傾到兩三點嘅地步都唔出奇。
 
 
  當然啦,運程講到尾都只係一個令你同女仔快小小熟絡話題,最多可以比你估到佢對咩類型嘅男仔會更加有好感,並唔可以單單靠運程嘅話題同知識就令你追到心儀嘅女仔。喺你同佢有話題之後,始終都係要靠你本身嘅幽默感同待人處事去決定你同個女仔有冇發展嘅可能。如果你除咗運程就冇嘢識、如果你份人自私縮骨冇承擔、如果你不修邊幅嚇到女仔連星座都唔想同你傾,我比你學到蘇文峰咁叻都冇用(佢把口另計,我覺得佢把口啲女會好受)。
 
 
  講到尾,想溝女,增值下自己啦。不論係外定內都好。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday

如果喜歡我們的文章,請即分享到︰

標籤: 毛言地  愛情  迷信  識女仔  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→