《我每晚都要夜瞓過女朋友》

毛言地 於 04/12/2017 發表 收藏文章
  女人要嘅被愛同安全感聽落好虛無好難做,但其實只要你對佢有一定嘅了解同肯花啲心思,要女朋友知你愛佢一啲都唔難。
 
 
  我女朋友鐘意人陪,同我拍拖之後痴過糖痴豆。係冇乜私人時間架啦,但見住佢痴住自己嗰陣個滿足樣,其實我都慶幸自己做到佢男朋友。喺街自然拖到實一實啦,返到屋企佢都唔捨得放低個電話,就算唔係傾電話都要耐唔耐WhatsApp下你先會安落。可能因為比人拋棄過,又或者再上一任成日對佢愛理不理咁,所以佢其實好缺乏安全感,恨不得搵條繩綁住我同佢,咁我就唔會突然消失唔見。我試過一邊摸佢個頭一邊同佢講我唔會咁做,但安全感唔係你講一句就有,而係要慢慢累積。所以喺一晚返到屋企之後,我喺傾電話嗰陣話同佢玩一個遊戲。
 
 
  「我同你鬥夜瞓。」我咁同佢講。
  「無啦啦鬥夜瞓做咩?」
  「唔話你知住,總之邊個WhatsApp五分鐘後都唔應人就係輸,輸夠七次請食飯。」
  「又好。」
 
 
  自此之後,我無論做緊啲咩都機不離手,佢一搵我通常一分鐘內就覆,而飲水去廁所或者伸完個懶腰就到我主動搵下佢咁。一開始佢真係搏咗命咁,平時一點就話眼瞓嘅佢居然拖到兩三點先冇反應,不過當佢連續兩個星期日都要請我食飯之後,佢就發現點都鬥我唔過,然後慢慢將瞓嘅時間轉返去一點咁上下。
 
 
  「唔知點解呢,我依排好似瞓得好咗。」曾經耐唔耐會突然醒一醒望下電話嘅佢咁同我講。
  「因為我嘅功勞囉。」
  「你又唔係成日過嚟陪我瞓,咁都關你事?」
  「唔係我點解要玩依個遊戲?」
 
 
  因為我會成晚都好快覆佢嘅WhatsApp,一有時間就同佢講下笑話傾下計或者Share得意嘢比佢睇,然後等到佢開始唔搵我,甚至我搵佢都冇反應我就知佢已經瞓著咗,咁我先會準備瞓。我想佢知道只要一日未瞓,我都會隨時聽到佢電話或者覆到佢WhatsApp,就好似我一直陪住佢咁,等佢可以喺最放心同有安全感嘅情況之下入睡。
 
 
  「傻瓜。」佢已經眼濕濕。
  「為咗你,夜小小瞓又點話。」我用手指輕輕掃走佢滴眼淚。「何況我個個星期日都有薯條食?」
  「好吖,我每個星期日都請你食薯條,你就每晚都陪到我瞓。」佢塞咗條薯條落我個口度。
  「成交。」我塞返兩條過去。
 
 
  好傻咩?話唔埋你做過嘅仲傻過我。
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
圖片來源:網絡取材
標籤: 毛言地  愛情  女朋友    

留言


請按此登錄後留言。未成為會員? 立即註冊
    快捷鍵:←
    快捷鍵:→