每個人心入面都有個不可代替嘅女神。 精選

　　而家依個世界每日都有新女神：靚啲嘅、文青少少嘅、可愛嘅、露半球嘅，只要你有一樣嘢吸引到人，你就係一個女神。奈何女神太多，J得A嚟丁唔切B，女神係愈多，但真正成到名比大家記得嘅反而愈少；就算記得，都好似同自己心裡面第一個女神相差好遠咁。冇錯，可能佢已經變咗中女、收咗山、甚至結完婚生埋仔，但喺你心目中，佢依然好似你第一眼見到佢咁驚為天人。
　
　
　　就以Leah Dizon為例，當年一隻「恋しよう♪」嘅MV就令我記得佢鬼死咁難記嘅名。我唔理佢唱歌有幾唔得、把聲有幾後製、衣著幾咁MK都好，「人靚著咩都靚」嘅道理喺佢身上表露無遺。識日文嘅混血兒加上惹火身材同外表注定佢成為一個女神，雖然紅咗冇耐就宣佈大肚結婚，但佢嘅MV同寫真都仲係咁令人津津樂道，唔信？邊個Click入嚟睇篇文唔係受張圖吸引？　
　
　　講返香港代表娜姐，就算咁多年過去依然都係我心目中嘅真正𡃁模，往後風光過嘅我都唔記得有邊個，唯獨周秀娜三個字印咗我喺個腦入面。情況就好似而家嘅杜小喬同Rose Ma喺過咗十年八年後會比一班啱啱過咗三字頭嘅人拎返出嚟同2027年嘅女神比，然後同班十八廿二講「依啲先係真正嘅女神囉好冇」咁。初戀永遠最深刻，第一個女神都係，依個光環永遠都係屬於佢嘅。
　
　
　　至於點解會咁？因為青少年係你對一切最好奇嘅時候，所以依個時間以女神方式出道又突圍而出吸引住你視線嘅就自然成為咗你心目中最美好嘅存在。唔止女神架，你睇下NBA同足球總會有一班懷念MJ同碧咸嘅人，當你迷緊咖喱C朗嗰陣佢地會話你知上一年代先係最吸引，你睇唔到係你可惜。畢竟第一個偶像真係替代唔到，到他日你迷嘅球星退休你就會明白依種感覺。　
　
　　每個人心入面都有個不可代替嘅女神，或者我應該講每個人心入面都有個不可代替嘅回憶，望住自己喜愛嘅女神生仔，鍾意嘅球星退落嚟，真係不得不感嘆時光匆匆。
　
　
　　你睇下，人老咗，幾咁鍾意想當年。
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材