當有一個唔阻你砌模形嘅另一半。

　　我識一個人，同樣熱愛文字、一樣鍾情曼聯、仲有係高達嘅愛好者。唯一一點唔同嘅，係佢已經結咗婚，係一位幸福人夫。
　
　
　　喺現今嘅香港，要開心唔係一件容易嘅事，特別係你身為一個男人。返工辛苦受氣可能男女都有份，但挨夜睇波比女朋友詐型、心愛模型比老婆低價賤賣，連打鋪機都逃唔過WhatsApp轟炸。唔知點解女人嘅興趣男人唔單止唔可以阻止，有時甚至要陪佢一齊行街煲劇；但男人嘅娛樂？女人只會用一句幼稚去形容。能夠有個唔掃你模形出街嘅另一半已經好好，如果佢願意一齊同你去買，甚至比你喺屋企Show出嚟嘅話更加係難能可貴，而依位人兄就係咁好彩。　
　
　　成功嘅男人背後可能有一個女人，但快樂嘅男人背後肯定有個好通情達理嘅女人。雖然只係同佢喺聚會見過幾面，但係佢嗰種開朗嘅性格真係會感染到身邊嘅每個人，同我地佢可以無所不談，由寫文到伊巴再轉去政治，甚至同我地一齊瘋狂孖車都好，太太都唔會話佢冷落自己；人前係咁，喺人後只見佢一有時間就踩單車同長跑，唔轉個大運包圍半個香港都唔肯收手，而太太就會煮定晚餐等佢返嚟補充體力。人生如此，比著我已經再無所求。
　
　
　　當然啦，依位人兄不時會同太太食好西、遊我覺得男人最唔想去嘅韓國、對太太嘅關愛更加從不缺少。我對你好，你又為我著想，望住佢地我第一次覺得「從此王子公主就快活咁生活落去」原來唔係只係一個童話。有人話男人要求其實好少，又有人話女人要求好簡單，但大家都只會抱怨對方滿足唔到自己，從來冇諗過點樣滿足對方，或者係自己嘅要求會唔會太過份。　
　
　　佢地唔係大富大貴，亦都唔係只羨鴛鴦不羨仙咁離地，但係嗰種簡單又幸福非常嘅感覺真係恨死隔嚟，即係我。平平凡凡咁相守到老，喺展示櫃嘅模型見證之下共同跨過一個又一個年頭，望住頭髮一年比一年少一年白，但陪伴身邊依然係同一人，仲有咩浪漫得過咁？
　
　
　　有都唔緊要，可以做到咁已經好夠。
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MOYINDAY
TUMBLR：http://moyinday.tumblr.com/Fanpiece：http://women.fanpiece.com/moyinday/
圖片來源：網絡取材