如果你信錯咗一個仆街。

毛言地 於 18/05/2017 發表 收藏文章
  愛情入面最重要係信任,依點人所共知。
 
 
  要幾耐先可以相信對方每個人都唔同,有人係一開始就完全信任,直到你每次呃佢先慢慢扣減;又有人係要慢慢建立,話唔定你要用一年半載時間先可以要佢信任你對佢係真心。一個人肯信你係好難得嘅事,特別當你係佢最親密嘅人,佢唔望你可以投入同等信任,但最起碼你唔好玩弄佢信任你嗰份感情。由開始嗰刻你就由謊言去建構自己一切,直到最後分開都要搾壓堆佢最後一點嘅信任,無數嘅大話比人拆穿係遲早嘅事,當你破壞哂信任嘅基礎,到底有咩理由去擺出一副「點解你唔信我」嘅表情?
 
 
  我喺過去每次拍拖都係投入百份百信任嗰個,無論對方話去玩、去同人食飯、去飲嘢都好,我都只會講低一句「OK,去啦」。直到上一次嗰個,就算一齊開始咗冇耐,就算有懷疑同不安,佢話要同個新識嘅男性食飯我都冇落閘唔比去。「世界唔係男就係女」依句我都成日講出口,佢講得比我知我就應該信佢,嗰一刻我係咁諗。結果我同佢好快就分開,佢嘅理由係想比心機讀書,想管理好自己生活,已經冇拍拖嘅動力。好假係咪?好典型理由係咪?點都好,我再唔捨得,再唔開心,除咗接受我冇嘢好做。
 
 
  最後係點?佢同我講嘅嘢當然係假。佢同咗之前食飯嗰個一齊,就係同我開始咗一個月都冇然後同我講有餐飯約咗人,點都要出去食嗰個。我對佢嘅每個信任反而變成傷害自己嘅原因,我甚至唔肯定佢對住我講嘅有幾多句係真心,佢以前點比男朋友玩,點唔開心,點樣喊法,創作能力真係高我幾班。講到依度應該好多人話一早就應該Feel佢到有古怪,明顯係攝時間,點會而家先知芸芸。
 
 
  我知,但信唔過佢一齊嚟做乜?只係佢唔係咁諗。
 
 
  原諒我寫得比較亂,因為我心情其實依幾個月都係咁亂,直到而家我先可以寫返件事出嚟,仲要一直食住煙冷靜自己先唔會手震。喺度同大家講句:你唔信人唔緊要,但輕視人地對你嘅信任真係最Cheap嘅行為。
 
 
  當一個人唔敢再信人,嗰種感覺除咗可怕,就係絕望。
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地  愛情  信任  仆街  

留言


請按此登錄後留言。未成為會員? 立即註冊
    快捷鍵:←
    快捷鍵:→