《起身一句早晨,真係好重要》

毛言地 於 16/08/2018 發表 收藏文章
   「早晨啊,起身啦,再瞓你遲到架啦」
 
 
  每朝聽到依句說話由另一半口中講出嚟,真係可以令你成日特別醒神,無論係佢瞓喺你身邊,定係專登打嚟Morning Call你都好,佢嘅魔力都係咁強勁。
 
 
  要Keep住兩個人嘅感情,生活上好多小細節都值得重視,而當中一句「起身」或者「早晨」地位更加係不可代替。一個人願意喺趕住梳洗起身出門口嘅早晨抽時間打嚟做你人肉鬧鐘,甚至早多少少起身就係為咗Morning Call你之後傾多陣電話,當中包含嘅愛意真係每個打工仔都會明白。風雨不改,每朝定時定候就有一個熟悉嘅電話號碼來電,未瞓醒嘅你聽到一把溫柔嘅聲線叫你起身,唔洗食老麥早餐都係Good Morning。
 
 
  有人話過一個人啱啱起身嘅時間係最冇機心,最真最自然嘅一刻。喺依個時候第一時間諗起你,打比你叫你起身嘅人,自然一早已經將你放係心裡面無可替代嘅位置,因為佢一起身就諗起你,怕你唔知醒遲到,更重要係想每一日第一句係同你講嘢,想聽到你把聲。依種最簡單又最真嘅感情係無價,得到嘅人一定要好好珍惜;又或者你地已經同居住埋一齊,但咁多年嚟佢仍然會叫你起身,輕輕錫你一啖然後起身準備早餐,等差唔多煮好之後再返嚟叫多你一次——就好似返咗細細個比啊媽叫起身咁,不過依種親切就多咗另一種愛喺入面。
 
 
  雖然每朝起身都好唔情願,但一諗起有佢會打嚟,多少都會有啲期待。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday

如果喜歡我們的文章,請即分享到︰

標籤: 毛言地  愛情  拍拖  生活  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→