只有你,我可以毫無顧忌。

毛言地 於 04/07/2018 發表 收藏文章
  「我同你要永遠痴住。」一個女仔喺大街上雙手攬實佢男朋友。
  「好啦好啦,你再攬咁實我行唔郁啦。」佢男朋友望住街上面旁人嘅目光,未飲酒已經面紅。
  「咁咪好囉,痴得夠實。」
  「你啊,仲細咩,再唔行睇唔切九點場架啦。」男仔指一指隻錶,仲有五分鐘部戲就開場。
  「好啦,咁就比你拖住我趕路啦。」女仔終於肯放開手,然後又馬上拖實個男仔,真係分離半秒都嫌多咁。
 
 
  睇完戲,送完女朋友返屋企——當然唔少得喺屋企樓下難離難捨半個鐘後,男仔自己一個坐車返屋企。一路上佢諗返起自己女朋友咁痴身,舉動又好似大唔透咁,佢仍然苦惱緊應唔應該要女朋友成熟小小。而家兩個人一齊係好開心,但如果想進一步見家長,甚至更長遠發展,佢當然想女仔可以更大方得體,而唔係而家細路女咁。
 
 
  第二朝男仔約咗附近返工嘅女朋友食午餐,但女朋友話仲有事忙緊可能要遲一陣,所以佢決定上佢公司等女朋友,順便比個驚喜。
 
 
  「佢同同事仲喺會議室開緊會喎,你去佢個位等吓?」
  「麻煩哂。」
 
 
  男仔坐咗一陣,好奇心驅使下決定去望下平時成個小朋友咁嘅女朋友做嘢會係點樣。一行近會議室,男仔見到女朋友一面認真講解緊自己意見,一面同相反意見嘅同事據理力爭,直頭比男仔自己平時返工更落力,同拍拖嗰陣完全兩個樣。
 
 
  依個時候男仔先知道女仔唔係唔成熟,只係對住男朋友可以做返自己,唔洗而家返工咁樣一個人撐住一切。好多時身為男朋友只會見到女朋友樂觀幼稚嘅一面,但佢地冇諗過可以見到佢依面嘅就只有自己一個,因為對佢嚟講你係會包容佢所有,接受佢一切嘅人。對住你,佢可以毫無顧忌,好好享受女朋友依個角色。
 
 
  「你又會上咗嚟嘅?」女仔出嚟會議室後,男朋友一早坐返喺個位等佢。
  「等你陪我午餐啊大人。」
  「乖啦,一於帶你去食意粉啦,我食過好正架。」
  「冇問題。」
 
 
  望住眼前嘅女朋友,頭先嘅威嚴冇哂,佢又再次變返平時笑嘻嘻嘅大細路。今次男仔冇再埋怨,反而更加珍惜女朋友依一面。
 
 
  佢明白到,咁樣係真愛嘅表現。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
標籤: 毛言地  愛情  真愛  女朋友  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→