《每日，我女朋友都要食朱古力》

　　女仔鍾意食甜品好正常，但鍾意到我女朋友咁嘅地步我諗佢都算係數一數二。佢每日都要食朱古力，無論係一排排嗰啲最典型嘅朱古力、心太軟甜品、甚至老麥嘅朱古力新地都好，總之每一日佢最少都要食到一樣有朱古力味嘅嘢先安落。記得有一次我OT遲放工，我地食完飯都十一點幾，附近甜品鋪排哂長龍，我地食間潮州嘢又冇朱古力甜品，最後我要拖住佢去便利店買番條朱古力雪條食先完成到一日一朱古力依個任務。
　
　
　　「點解咁鍾意食朱古力」依個問題我有問過佢，佢話我知細細個因為一啲問題要寄人籬下，每一日都受盡苦頭，唯一可以叫開心啲嘅時候就係放學自己去買朱古力食。可能係慣咗，又可能佢將開心同朱古力嘅味道掛勾，所以就算而家返返屋企生活都好，朱古力已經離唔開佢生活。知道朱古力對佢咁重要，我自然諗盡辦法等佢日日有朱古力食，為嘅就係佢嗰個滿足嘅笑容。　
　
　　為咗等佢每一日都一定有朱古力食，我差唔多每個星期都會買定一堆有朱古力嘅嘢上佢屋企：唔同牌子嘅朱古力條啦、蛋糕啦、綿花糖啦，基本上除咗我地都覺得唔好食嘅朱古力薯片之外，所有朱古力製品我都買過哂。雖然定期買朱古力已經滿足到佢要足，但係身為一個精益求精嘅男朋友，都想係依方面再比多啲驚喜佢。
　
　
　　雖然我份人對煮食冇咩天份，但我都喺女朋友生日前一個月報咗一個甜品班學下整甜品嘅基本技巧，然後再靠全能嘅YouTube惡補我嘅甜品知識。經過十幾次嘅失敗，我總算掌握到一個心太軟大概嘅製作技巧，然後喺佢生日嗰晚提早上佢屋企準備定。我仲好記得佢打開門嗰下見到我喺廚房準備嘢食嘅驚喜，雖然餐飯只係原本諗住Medium-Rare但變咗接近Well Done嘅牛扒配煮到黃哂嘅西蘭花，但係佢一啲怨言都冇，而當我拎個心太軟出嚟嘅時候佢更加係開心到叫出嚟。佢落刀切嗰下我連氣都唔敢抖一下，直到見到個心開始流出嚟先鬆一口氣。雖然餐飯煮到我大汗疊細汗，但見到佢一路喊一路話好味個樣，真係咩都抵返哂。　
　
　　到而家我仍然會同佢不時周圍食朱古力甜品，忙嘅時候就靠朱古力餅，有時間就自己試下整咁。佢曾經問過我介唔介意日日都要食朱古力，我話日日見住你同日日食朱古力都係一樣咁令我開心。
　
　　　
　　然後，佢冇嬲我，而係大大力咁咀咗我一啖。
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/圖片來源：網絡取材