有冇諗過，佢會唔會係你另一半？ 精選 推薦

　　大家可能有鍾意既對象，或者已經拍緊拖。可能大家覺得，係得閒既時候有個男女朋友陪自己短訊、傾電話、行街睇戲食飯。有一個自己鍾意而又親密既人係身邊，係一件好甜蜜幸福既事。我唔否認，拍拖係好開心，特別係學生時期，你既世界有一大部份都係佢，恨不得時時都可以同佢一齊。但係，你又有冇諗過，將來會係點？

　　要搵一個男女朋友可能唔易，但比起要搵到一個可以同你共渡將來，兩個人一齊建立家庭既另一半，仍然係易上千百萬倍。男女朋友大多時候都係一齊過開心既日子，只要係為左Ｄ芝麻綠豆既小事鬧交，就有可能會搞到去分手既地步。可能你理小左佢一陣，或者做左一件佢唔鍾意既事，佢已經會覺得你係咪唔再鐘意佢。又或者你會懷疑同佢行得好埋既異性係咪對佢有野，又或者嬲佢唔識避忌一下。而家香港太多速食愛情，只要雙方有好感就好快會係埋一齊。但亦都係因為咁，只要一過左熱戀期，雙方冇再好似一開始咁晚晚電話，成日見面，大家就會開始埋怨點解對方對自己冇之前咁好。最重要既係，男女朋友可以好簡單，講聲分手啦就斷絕大家既關係。當然而家離婚都唔係難事，但我一路覺得，會分開，就係因為雙方冇盡力去為成為雙方既另一半。
　　愛，除左講鍾意，講一齊要開開心心，其實最重要既係互相信任，理解，體諒。同樣地，要達成信任，首先就係大家都唔可以咩都收收埋埋。當然大家都係人，都應該有自己既秘密，但例如你今晚約左個異性既朋友單獨食飯，如果你因為怕另一半會亂諗野要唔同佢講，或者話同一班朋友去飲野，到最後比佢發現你同一個異性食飯，對方會點諗？當然，有可能你既男女朋友係一個易呷醋既人，咁你又應該諗下你係咪唔應該單獨約異性見面？如果你覺得「咁樣即係影響我私人生活姐」，咁唔好意思，日後你地真係結婚住埋一齊，照見口晚見面，大把有依Ｄ衝突既時候。如果你真係接受唔到對方既習慣或者缺點，咁你同佢可唔可以過人世？要同對方一齊生活，你就應該要清楚對方既性格。你知道對方係大情大聖既人，不論男女都可以玩得好埋既，你就應該要信佢，因為依個係佢本性。但同樣地，如果你就係果個大情大聖既人，而你另一半亦都選擇信你既，麻煩如果你同異性出街都可以主動講聲，唔需要呃佢。
　　另外，係雙方既關係入面，好難要男女都有相等付出。總會有一方比另一方付出更多既時候。但如果你真係鍾意佢，你唔應該計較點解次次都係我點點點點點，女方成日都話男既唔夠細心，但你都冇可能要男既將全副心機放係你身上而放棄學業事業。如果你計較對方付出既唔夠你多，你係咪應該諗下，你係鍾意佢丫，定係只係想有個人對你好呢？

　　而無論拍拖定過人世都好，比較永遠係最唔要得既事。果Ｄ「啊邊個邊個對女朋友幾細心」或者「啊邊個邊個幾識就佢男朋友」之類既廢話其實唔應該出現係你心上。單純就客觀分析，永遠冇人係各方面都係完美，永遠會有人係某方面比你既另一半好。如果你下下都咁比法，冇人頂得你順，你亦都冇可能搵到一個你真係滿意既對像。

　　最後一點，男女拍拖係兩個人既事，但當你決定結婚一齊既時間，除左你同佢，就仲有你地既家庭。你同佢既洗費再唔止係戲飛飯錢或者買公仔禮物比佢既錢，仲有供樓（或者租金）水電煤買餸錢等等。當你地生左個細路，又會多左一筆開支。你地既世界唔再係只有對方，仲有你個仔女，大家既父母；要面對既再唔係你地之間出現左咩大大小小既問題，而係你地既家，你地既父母，你地既生活既每一個問題。可能你覺得同佢拍拖會好開心，但當你想同佢更進一步組織家庭既時候，要考慮同承受既事，絕對比你想像中既更多。如果你地未肯定自己真係可以做到「信任，理解，體諒」，你地就真係要諗下係咪真係咁快決定結婚。唔係既話，大吉利是講句，結完婚先發現你頂佢唔順又或者大家理念風馬牛不相及既話，真係貪離婚光彩咩？
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材。