千祈唔好揀個鐘意戴水晶鏈嘅女朋友。

毛言地 於 16/07/2016 發表 收藏文章
  「水晶可以帶嚟好運」,依句係好多迷信嘅人堅信嘅說話,由Office果一大嚿水晶到可以戴上手嘅水晶鏈都會有人當寶。

  但我真係唔明覺得水晶可以改變自己班友點諗。

  當然有啲水晶飾物好靚,用嚟打扮襯下衫係唔錯的。但好多人手上戴足四五六條水晶鏈,就嚟湊齊彩虹色都只係為咗「加運」,就好似當自己打緊機咁:條鏈係裝備,戴咗有效果,如果你著夠一套可能有加乘添。「依條加愛情運、依條就保工作學業、果條係人緣⋯⋯」望住佢地指住啲鏈如數家珍,我心諗給果你肯放心機喺其它嘢上面,你應該一早成功咗。

  我唔反對人迷信,即係通勝果啲宜乜乜忌乜乜啊、結婚要擇日啊、屬豬牛雞唔可以見親人最後一面之類,你要跟住做我覺得OK。一嚟依啲係習俗,二嚟抱住一個小心駛得萬年船嘅心態做人都不失係一個好方法。但信水晶改運嘅人點解覺得你戴住條鏈就會有人追?點解你戴住條鏈溫書就會有5**?有人話因為水晶有磁場影響,咁你直接拎住嚿磁石擺上身效果咪仲明顯?我寧願信汽水機運作原理係因為硬幣導致磁通量改變都好過信水晶嘅力量。

  如果你女朋友真係咁信水晶,次次同你出街隻手都好似水晶鏈展示區咁你又頂唔頂得順?你想買對情侶鈪同佢一齊戴都要睇下佢手臂仲有冇位先;事業有阻濟千祈唔好同佢講,佢一定買幾條水晶鏈比你叫你戴住返工改運。仲有,佢地瀨祈福黨嘢嘅機會更大,你要由心理準備隨時接濟下佢,分分鐘未結婚已經要一份糧兩個用;加上迷信依樣嘢係年紀愈大中毒愈深,一個廿幾歲已經迷水晶嘅人三四十歲會變成點樣,我唔敢想像。

  將自己嘅希望放喺水晶身上嘅人都有種逃避問題嘅諗法,想靠條水晶鏈幫自己解決問題,但又冇諗過好多問題要解決就一定要靠自己努力。要成績好點解係帶水晶而唔係溫書?要異性緣好點解唔係去識人而係戴水晶?係咪我戴咗條偏財水晶鏈就可以即刻中條三串一?如果水晶真係咁堅,咁開鋪賣水晶鏈果班間鋪一早唔洗開鋪啦,仲洗喺度哂口水叫你幫襯佢咩。

  如果你女朋友係其中一個水晶信徙,不妨今晚就坐低同佢講你鐘意佢嘅原因有好多,但絕對唔關條水晶鏈事。及早帶佢離開對水晶嘅依賴,對佢同對你都有好處,起碼短期洗少筆買水晶嘅錢,長遠又減低佢變成一位神婆嘅機會。如果你而家單身,又或者你對像係一位水晶狂熱者,喺開始追女仔之前不妨將依點加入埋考慮因素,總好過將來追到手先嚟後悔。

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材。
標籤: 毛言地  愛情  水晶  

留言


請按此登錄後留言。未成為會員? 立即註冊
    快捷鍵:←
    快捷鍵:→