喺香港見到人睇書,係奇景。

毛言地 於 27/02/2016 發表 收藏文章
  你有幾耐冇見到香港有人會喺條街睇書?

  你回想下喺巴士地鐵、喺星巴克、喺街邊、喺公園嘅時候,你對上一次見到人睇書喺幾時,甚至已經耐到唔記得左?然後再問下自己,對上一次會拎起一本無關課文嘅書嚟睇又喺咩時候?

  我知香港好多人仲會行書局,但我去親唔少人流都集中喺講股市、講旅遊又或者喺工具書(做練習果啲),甚至純粹去誠品睇精品或者打卡。真喺會拎住本書慢慢睇嘅人有,不過比例唔算太高。香港人嘅勢利其實喺書店都睇得出,睇股市書喺想賺錢,睇旅遊書喺準備去玩,冇幾多個人會拎起本講香港歷史嘅書去睇,因為睇完唔會即刻有用,唔會令你搵到錢。

  好多人鍾意文青打扮,好多人鍾意話自己有書卷味,但咁多位文青Look當中又有幾多個係真文青,其實大家心照。一個唔睇書嘅文青,同一個唔鍾意去MK嘅MK妹一樣,成件事一啲都唔Make sense。當我今朝喺地鐵見到一個打扮冇半點文藝氣質嘅女仔拎住本書喺度睇,其實我真係好驚喜,原來仲會有人肯拎住本書而唔係iPad出街,我諗個機率同你搵到一個女神佢仲會同你主動打招呼差唔多。
  點解有啲老一輩講嘢咁有說服力,點解黃子華講啲金句抵死得黎又咁有Point?我諗唔多唔少都喺拜佢地肯睇書所賜。書嘅內容唔同網上啲文,出版社覺得有料到先會出錢,編輯會執好哂錯字格式,一本放得喺書局賣嘅書,其實包含左個作者多年經驗見解,又或者肯定係一個有吸引力嘅故事。你肯花時間上網尋寶一定搵到好嘢,但書局放得上書架嘅通常衰極有限,依個就係網絡同書嘅分別。

  其實要搵本你有興趣嘅書唔難,問題只喺香港人好多時唔肯花啲時間喺睇書方面。成日話唔夠時間用,但如果你肯睇少陣TVB,煲少幾套韓劇,等睇波前果個鐘唔係喺度Hea而係拎本書睇下,未必可以局長咁一個月十幾廿本書(雜誌),但一年十本其實唔難。接觸下唔同作家嘅故事,投入唔同世界經歷唔同嘅事;又或者睇下講科學同歷史嘅書,一段時間之後你會發現你出到去話題闊左,冇咁易冷場,突然好似變左一個知識份子咁。無他嘅,睇書多左,識多左野又或者個人感性左(我好似吹大左啲),要搭嗲都易啲。

  書卷味唔係靠個Look就搞得掂,話明係味道,你要有真材實料先可以,否則你最多咪羅湖城A貨水平。出街搭車,等女出街掃到Facebook冇嘢好睇?點解唔試下拎你書櫃果本未睇但封哂塵嘅書出嚟,又或者去書局轉個圈搵本書睇下?市儈啲諗,而家啲女咁鍾意文青仔,又覺得識嘢多嘅男人吸引,睇多啲書增加下自己喺女神面前嘅吸引力都幾好。咁好彩比人影到你睇書個認真樣放上網,你做男神就真係指日可待--唔好意思,我講得太興奮。

  動機係咩唔緊要,最重要就係推動到你去做。老套講句,睇完書學到、感受到、領悟到嘅嘢都係你自己嘅,袋多啲嘢傍身,唔好咩?

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/  
Fanpiece:http://women.fanpiece.com/moyinday/

如果喜歡我們的文章,請即分享到︰

標籤: 毛言地    女神  男神  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→