其實揀銀包同你拍拖揀女朋友分別唔大。

毛言地 於 23/02/2016 發表 收藏文章
  BAUHAUS果隻TOUGH牌子銀包,我諗應該有好多人用過。老實講,一個真皮銀包賣幾百蚊仲要佢個DESIGN唔錯其實真係冇咩可以挑剔,所以我求學時期都買過兩個自用,第一個係有條牛仔褲喺上面,第二個係英國國旗。
  不過當人大左,可能覺得銀包應該愈簡單愈好,有人開始自己買皮整銀包,又或者因為開始講究牌子而轉投BURBERRY同Bottega Veneta之流,我暫時未見過一個三十歲打後嘅人仲會用TOUGH依隻牌子。如果要我用女人做比喻,可能TOUGH就係一個MK妹:外表唔喺差,上手唔喺難,但一兩年之後你就會好想換另一個,因為你絕對唔會想一世都對住個TOUGH銀包--十幾歲仔用冇問題,但到三十歲仲拎個TOUGH銀包應該會比人笑。
  人大咗口味就會轉。我唔會話咁喺一個成熟咗嘅表現,而喺你嘅要求唔同左,或者你更加清楚自己想要啲乜。以前你覺得拎住個TOUGH銀包好型好威,但到你出黎做嘢之後你先知道原來世界上仲有更多好過TOUGH好多嘅銀包,其至有好多人淨係上到大學就已經知道依個理由,所以你見到好多人上左大學冇耐就會換一個新銀包。你話佢貪新忘舊又好,你話佢追求名牌都好,口味變左就真係返唔到轉頭。
  你以前個銀包用唔夠兩年就開始甩色甩線,所以你換左個新銀包之後你開始知道要點樣好好保養依個銀包。你唔會再放佢喺後褲袋由得佢,你會拎個袋出街袋好佢、連埋部電話拎上手、或者好似西裝友咁放喺衫嘅內袋。或者你用緊嘅係自製皮銀包,用得愈耐反而愈有味道,你對佢更加愛不釋手,其它銀包嘅吸引力都唔夠佢咁大。當一個人到左三十歲咁上下,佢就會搵到一個真正啱佢而佢又用得起嘅銀包。
  唔好因為你而家個銀包爛左唔見左就傷心或者覺得人生已完,終有一日你經過一間鋪頭,你總會發現到一個啱自己心水嘅銀包。無論喺名牌又好,自製皮銀包又好,總之比你之前果個TOUGH更好嘅,大有人在。
  啊唔係,應該係大有包在。
  
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/  
Fanpiece:http://women.fanpiece.com/moyinday/
標籤: 毛言地  銀包  女朋友  

留言


請按此登錄後留言。未成為會員? 立即註冊
    快捷鍵:←
    快捷鍵:→