女朋友話未去過蒲,想趁後生試吓...

熱豆腐仔 於 23/10/2018 發表 收藏文章



當一件事出現對立嘅情況,相信就係情侶鬧交嘅開始..

「如果我話唔想你去呢?!」

「但我真係想見識吓..」

呢個係我同女朋友當日最後嘅對話,之後就無再應過佢。我叫柏豪,Cindy喺我大學玩OCAMP認識嘅組員,而我地對大家都有Feel好快一齊咗

仲記得識佢嗰陣都係乖乖女,無化妝、無打扮,老套啲講句就係宅女一名,但正正佢呢種性格,先令我更加鍾意佢!

不過,人始終都會改變。
.
.

唔知幾時開始,佢對外表開始有所要求,甚至..開始有啲沈溺。或者你會奇怪,女朋友變靚、變好,作為另一半唔係應該支持同開心先啱咩?

的確每個人都鍾意靚嘢,我覺得無問題,亦都支持。
尤其佢箍牙期間,每次睇完醫生之後都話太痛,我都不厭其煩咁陪佢食一啲佢食到嘅嘢。就係咁樣幾年過去,年期終於夠,我同佢都好期待唔洗再箍牙出街嘅日子,而女朋友更加開心到訓唔到著,好似迎接緊新生命一樣

「柏豪!我終於可以露齒影相啦」

呢句說話,唔知點解我好深刻...

或者喺佢之前唔太活躍嘅IG,突然之間多咗好多自拍照..同時亦唔知心理作用定性格突變,佢變得好鍾意識人、鍾意傾計,就連平時好多無接觸嘅嘢都變得有興趣approach ,包括落club..
.

有一日,佢終於忍唔住問我。
.
.

「柏豪,我同班姊妹想落中環飲嘢」

「同中學個班?Macy佢地?」

「唔係呀,你未見過架~」

其實,有時覺得陌生到就連佢多咗班鍾意飲嘢嘅姊妹,我都唔知..
.

「點解咁多地方揀,係要落老蘭?你明知嗰到多club好複雜」

「咁嗰到佢地話氣氛好啲呀嘛,我又未去過,想趁後生試吓姐。放心啦,佢地會睇住我架啦」

或者亦有人會奇怪,其實只係同朋友去飲酒放鬆吓,有咩問題?會唔會太緊張?
如果你係單身去嘅..真係唔會有問題,不過當你有另一半嘅時候,真係會放心畀佢落去喜愛夜蒲?
可能小男人嘅我真係太小氣...
但呢樣嘢聽都聽得多、睇都睇得多,夜場嘅嘢唔係話你控制到
.
.

「或者你思想好簡單,純粹想體驗吓,但你知唔知入面有幾多狗公等住你呀?!我相信你控制到自己,但我係信唔到班狗公呀!你阻止到佢地抽你水咩!」

呢一刻,真係唔小心爆咗。可能班女仔永遠都唔明白呢個道理,又或者,係我太小人之心
但我又點會唔明白班男仔落club嘅用意,因為我都係男人..

「你做咩咁惡呀!?都話我會保護自己!同埋你估個個男人都好似你咁諗咩?」

原來出面嘅男仔,竟然比自己男朋友好更加好、更加善意..去到呢刻已經唔想再講落去,反正都唔會有結果

但我一直唔明白點解佢地可以咁相信自己班姊妹可以保護到佢,我唔係介意你有其他興趣發展,亦唔係介意你認識新朋友,但點解一定要去呢種敏感場合!?

大家飲到醉一醉,加上燈紅酒綠嘅氣氛,我已經好難再用常人常理角度去判斷!就算你真係無事,就算你班姊妹真係復仇者聯盟咁貼身保護,但我一刻、一秒都唔想你比其男仔溝你聊你...

可惜呢啲說話,只係放係心入面,並無同佢講
.
.

冷戰咗幾日,直到星期六晚我忍唔住Whatsapp 問佢

「你今晚..真係仲要去?」

雖然機會渺茫,但曾經有一刻我都天真咁諗過,佢會唔會真係怕我嬲而有所改變..

原來,我真係天真過阿嬌。

「已經約咗佢地,唔想放飛機」

原來一個人決定要做一件事,其實點都總會有藉口。或者好多人都一樣,未試過、未奶過嘢係唔會心息

雖然我真係好嬲佢,但消咗氣之後,反而有種坐唔安嘅感覺....最後,我竟然癲到決定落去中環搵佢...
.
.

夜晚嘅中環,的確有種不一樣嘅感覺。

我慢慢向上行,見到一個熟悉嘅畫面..估唔到喺遠處一間酒吧門口,見到佢地幾個女仔,其中一個..就係Cindy。

呢刻佢地只係飲吓酒、傾吓計,並唔係想像中落Club跳舞...雖然係咁,但理性同我講佢地只係未開始落去..

就係呢個時候,佢地身後卻有幾個男仔行緊埋去….


(待續)
.

FB:熱豆腐仔
https://www.facebook.com/hothottofu/

IG: hottofuzai
https://www.instagram.com/hottofuzai/

================================

【又到十月Halloween】哈囉喂和女朋友玩鬼屋,但開始發現..鬼屋裡的人已經很久沒出來了

http://bit.ly/2dZJpNt

如果喜歡我們的文章,請即分享到︰

標籤: 情侶  愛情    酒吧  中環  蘭桂坊  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→