自從同女朋友拍拖，我就好似個芭比公仔咁。

　　每個女仔都有一個芭比公仔，依句說話我深信不疑。對女仔嚟講芭比好比男仔嘅高達咁重要，係佢地細個重重要嘅玩具，甚至朋友，只係大個之後冇時間，亦唔好意思玩落去。
　
　
　　我相信我女朋友原本都係咁——直到同我一齊之後，佢發現可以將我當芭比咁玩。
　
　
　　芭比最好玩係咩？就係換衫。一時著下公主衫，一時又變成貴婦Look咁。當然我冇可能著女裝啦，但係平日著衫嘅配搭基本上比佢控制哂：由返工嘅輕便斯文、同佢出街嘅文青打扮、到同佢屋企人食飯嘅全副武裝，基本上由副眼鏡落到對鞋都係佢嘅主意。可能你會話「咁幾好吖，著咩有女朋友幫你諗唔洗煩」，初初我都係咁諗，但每個人嘅品味唔同，最起碼顏色冇幾可搵到個共通點。我仲記等有一次佢買咗件墨綠色恤衫比我，話隻色同我好襯，結果嗰晚出街我覺得街上面嘅人都望住我，係望住嚟笑嗰隻。邊有人著啲咁嘅色嘅恤衫架。　
　
　　有時落街食個飯咁我會好想街坊打扮落去就算，但同佢一齊之後我都唔知幾耐冇咁舒服咁出街。以往最快十秒著好衫落去食個乾炒牛河，但而家比佢左襯右襯一輪先出得門口，落到去已經變咗食下午茶嘅肉丁炒公仔麵。我同佢講「落一落街唔洗襯咁靚啦」，結果佢同我講「咁條街有人就要執靚仔啲啦」，我仲可以點？
　
　
　　我有幾耐冇自己買衫？咪就係同佢拍拖之後。基本上以前我買落嘅都比佢扔得七七八八，係有幾對限量版波鞋幸免於難。你以為有人幫我買衫我洗少好多？唔好傻啦，你細個幫芭比買衫都係洗屋企人錢，而家佢就實行取之於民用之於民：全部衫用我張卡埋單。好彩佢精於上網買平衫，出街都甚少買名牌，唔係我諗一早就破咗產。　
　
　　每次出街朋友都羨慕我有女朋友幫我執到靚靚仔仔，我只可以一笑帶過，暗地裡羨慕返佢地可以咁輕鬆短褲人字拖同我落大排檔食飯。表面風光嘅嘢，我最明白。
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材