《男人，切忌濫用你嘅風度》 精選 推薦

　　風度係男性嘅一種氣質，嗰種待人接物、舉止、談吐都散發住一種女性無發抗拒嘅吸引力。一個有風度嘅男性會為女性著想，以女性感受為先，比到女性一種被呵護，被欣賞嘅感覺。不過風度嘅表達都要睇情況，如果唔係你唔單止會變成一位狗公，最後甚至會傷害到自己。
　
　
　　紳士同狗公嘅最大分別在於你會唔會對一個自己冇好感（我講緊愛情方面）嘅女性，甚至同性展現出你嘅「風度」。有人會對自己心儀嘅女性做好一切，由朝早一個問候到夜晚傾電話搏君一笑務求交出最好表現拎分；但亦有人係對身邊嘅人都表示出關心，即使係行街見到啊婆都會為佢推門。時間一耐，到底你係紳士定狗公大家好快就睇得出，因為你點對人，大家都會感覺得到，一個只會對一個靚女好嘅男人又點比到好印像人？　
　
　　風度唔只係代表你為別人付出幾多，有時候都要識避識收。例如你無意中知道咗啲對方唔想人知嘅事，你好應該隻字不提，最好就忘記埋佢；識得抽身都好重要，追唔到個女仔或者分手後要抽身，大家變返只限一般交流，等大家盡快回復正常生活。當然啦，以上講嘅好睇情況，例如係咪一齊過、係咪有呃過對方、甚至一齊緊嗰陣係咪有第三者等等。有啲時候有風度地抽身當然係紳士，但如果你自己有比人誤會，甚至係被騙嗰個，解釋都係一件必要嘅事，畢竟風度唔係一味為人著想，而依樣亦係風度咁難表達得好嘅原因。
　
　
　　做男人要有風度，要多而不濫，要不溫不火，仲要唔好比人利用，真係要靠洪金寶幫我返一句。　
　
　　「唔係咁易架。」
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材