千祈唔好問男朋友覺得你靚唔靚。 精選 推薦

　　如果要數男人喺拍拖入面最憎嘅環節，一定係比女朋友問埋哂啲答唔答都死嘅問題。
　
　
　　「BB你覺得我今日靚唔靚啊？」
　　「BB你覺得我今日有咩唔同？」
　　「BB你係咪真係愛我架？」
　　「BB如果我同你啊媽跌落水你救邊個？」
　　「BB⋯⋯」
　
　
　　頭兩句啲女人好鐘意拍拖見到面第一句就問。唔好以為第一句易答啲，其實你答「靚」、「唔靚」、「日日都咁靚」同「屌你老母問撚完未啊仆街」個後果都差唔多：就係你會激嬲你女朋友，然後今晚嗰餐又要一千蚊落樓再食多件Cake先搞得掂（我唔知最後嗰句有冇用啊下，我未試過）。第二句仲衰，可能我記性差啦下，我連女朋友上次著咩衫都未必記得啦，何況佢個答案係用電髮夾夾咗個髮尾？好啦今次記住佢個髮型，但下次變嘅就係水晶甲、耳環、大眼Con、新鞋⋯⋯永遠都估唔中個答案，然後每次都要氹返佢開心，我諗依種情況拍過拖嘅人都會試過。　
　
　　男人係一種好直接嘅動物，女人都話我地係用下體諗嘢就證明我地有幾行動派：點為之行動派啊？愛你咪追你、陪你、你要去邊都冇Say No，但就係唔會同你講有幾鍾意你（除咗示愛嗰次），因為男人覺得做好過講。你問個男人有幾愛你我地就真係唔識講嘅，我地覺得同得你一齊就愛你架啦，唔愛就唔會同你拍拖啦，咩點愛法有幾愛真係好考起我地。唔係話我地男人唔識浪漫，而係男人要浪漫得嚟又實現到先會講出口——佢可以為照顧你下半生作出承諾，可以為咗你改哂佢啲壞習慣，但係要佢好似韓劇主角咁深情剖白？你睇下幾多男人唔鍾意睇韓劇就知冇可能。
　
　　　男人唔鍾意女人問依類問題除咁唔知點答，更重要係佢唔明你點解要問。邊個晚晚等你收工食飯睇戲傾電話用哂啲時間陪你；邊個知你唔舒服即刻買碗粥飛的嚟睇你 ；邊個因為你煙又唔食酒又唔飲原因係你一句唔鍾意；邊個為咗你去旅行都要揀韓國依個只啱女人去嘅國家（梨大附近嘅Club好正？你帶住條女去嚟做乜？）。男人愛唔愛你其實日常生活無時無刻都表露緊出嚟，只係你自己Feel唔到。當你問佢嘅時候其實佢心裡面好想講返以上嗰堆說話，但為咗唔令你唔開心，佢收埋所有埋怨，收埋所有粗口，然後講返「緊係愛你啦傻豬」依句女人認為好行嘅說話出嚟。你有冇諗過肯咁講嘅男人其實為你付出咗幾多嘢？
　
　
　　反正你知問完都唔會有個滿意答案，反正佢睇落再冇情趣再唔識氹你都依然係對你咁好，點解仲要問依啲令兩個人都難堪嘅問題？佢愛唔愛你，其實見到佢等咗你兩個鐘都冇講粗口，你一早心裡有數啦係咪？　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材