5種將一個人趕出腦海的方法 精選 推薦

有冇一個人，總可以隨時隨地撩撥你嘅情緒？佢每個動作、每個Facebook status、WhatApps icon、Instagram post都可以侵佔你嘅腦海成日……你想盡辦法，希望能夠將佢趕出你嘅思緒，唔比佢影響到你嘅生活、你嘅工作，但你唔知可以點做。其實，要將一個人趕出腦海，並唔係咩難事，或者你可以試吓以下嘅方法。

一）專注工作／學業
Assignment、proposal、project……喂，成堆嘢等緊你做呀！幾時開工呀？唔好吓吓都做deadline fighter先得㗎！早d做完有多d時間改好佢，隨時爆GPA、升職加人工㗎！你唔係為咗個男人放棄呀嘛？
二）培養興趣
睇書又好、彈琴又好、行山又好、影相又好，揀一樣你有興趣嘅嘢，分散吓自己對佢嘅注意力之餘，又可以提升自我修養，一舉兩得，何樂不為？

三）多與朋友相聚
搵你d三五知己出嚟玩，但記得話題唔好再講嗰個男人喇！你d fd成日聽你呻，你唔煩，佢地都厭啦！你班fd唔係你嘅情緒垃圾桶，唔好比晒d負能量比佢地。同佢哋一齊開開心心食餐飯、睇場戲、去OP玩，一齊嘻嘻哈哈咁過，仲邊得閒掛住你嗰個男人？

四）同屋企人／朋友去旅行
離開一個你熟悉、充滿回憶嘅地方，去一個陌生嘅地方探索係一件好刺激、好開心嘅事。咁當然唔好自己一個去啦──自己一個你咪又係會諗起嗰個人。所以最好就同屋企人或者朋友去，可以一齊玩、分散注意之餘，仲可以多個照應吖嘛！
五）自我催眠
呢招小編都用過。一開始可能唔係好得，但之後就會開始覺得自己諗起佢嘅時間少咗、對佢嘅熱情都淡咗。點樣自我催眠？就係去諗一啲佢嘅缺點，或者一啲佢令你好失望嘅事。咁你就會開始覺得：其實你都唔係好鐘意呢個人啫！慢慢佢喺你腦海出現嘅次數就會越嚟越少……

其實，講到尾都係想提吓你，生命入面仲有好多值得你關心嘅嘢──你嘅家人、朋友、工作學業、自我修養同見聞──冇可能將所有精神同注意力放喺一個人身上，咁係一種好唔成熟嘅做法。去愛別人之前，一定要先學識去愛自己，咁先唔會令自己愛到遍體鱗傷。