【感情降溫?】增進感情八大法!

隨思.隨想 於 03/03/2017 發表 收藏文章
聽講,情侶嘅熱戀期平均係一年左右。即係話,大約一年後,感情就會逐漸降溫(當然,如果你同伴侶過咗好多年都仲係熱戀緊嘅話,咁真係恭喜你!希望你們可以繼續甜甜蜜蜜<3 )。但如果唔想感情慢慢變淡,有咩好方法可以挽回,令感情升溫呢?下面就有八個方法,大家不妨參考參考:

1)一齊打機
我諗正常嚟講,應該每人手機入面都會有起碼一隻game嘅(應該係)。除咗對方本身玩開嘅game之外,我哋仲可以搵d新game,同另一半一齊玩、一齊升呢~例如我本身有玩開Tsum Tsum,男朋友好好,down咗嚟同我一齊玩;相反,我知佢鐘意玩RPG game,就同佢玩吓呢排出嘅“如果的世界”咁(利申:唔係賣廣告)。仲可以喺個game入面結盟、拜師,又鬥快升呢、一齊做任務咁,真係會多好多樂趣!有d game仲可以結成伴侶甚至結婚~~喺遊戲入面過吓結婚癮都幾好~

2)一齊做運動

當然,首先你地要真心鐘意嗰樣運動~有時星期六、日可以同伴侶行吓山,呼吸吓新鮮空氣,其實都真係幾寫意、幾放鬆~尤其是依家未係夏天,行山唔會出晒汗痴笠笠!所以呢排行山都係一個唔錯嘅選擇!當然,初初入門記得唔好揀d高難度嘅山嚟行啦!作為開始,小編覺得城門水塘同埋鹿頸都係比較容易行嘅地方~
再唔係可以去嘉頓山睇吓日落、影吓相咁~
如果唔鐘意曬,大家都可以揀d室內做到嘅運動,例如泰拳,學完仲可以一齊打交添呀(講笑)!增進到感情之餘又可以keep fit,一舉兩得!

3)一齊野餐
依家咁嘅天氣,十幾廿度,最適合去野餐!出發之前可以同另一半一齊去超市買嘢食,然後一齊整愛心三文治、煙韌菠蘿腸仔……真係諗起都sweet!Btw如果唔想整嘢食嘅話,去買幾盒壽司、買個KFC桶餐,再去超市買個生果盤,其實都幾夠食~然後大家坐喺餐墊/草地上面傾吓計、講下將來(或者迫佢聞吓你隻臭腳),咁就開開心心過咗一個晏晝~


4)Keep住每日搵對方
千祈唔好以為呢件係一件好普通嘅事!實際上,有好多情侶可能唔會日日傾電話,甚至連msg都欠奉!其實,就算幾忙都好,講句「早晨」、「早抖」,都唔係好難姐~如果係愛對方嘅,每日都關心一下對方,其實都唔係好難為你姐~

5)偶爾比d小驚喜對方
其實真係好小嘅小驚喜就夠~例如買一件對方鐘意嘅衫送比佢、請佢去間好d嘅餐廳食飯,甚至可能啪啪啪嘅時候同佢玩吓role play、著下情趣內衣咁,咁已經好足夠架喇~P.S. 情趣內衣淘寶有好多

6)金錢同時間許可嘅話,可以一齊去旅行
當然首先要有錢同時間啦~如果冇錢嘅話,唔洗下下都一定要去日本台灣韓國歐洲嘅~近近地,澳門就已經幾多嘢食、幾多嘢玩~想再平d嘅話,可以返大陸,去東門兩日一夜食玩買~東門買嘢出名平,同埋有間機舖,入面d機平過香港多多聲!夜晚可以去食海底撈,然後揼骨~諗起都開心!

7)培養共同興趣、一齊學習
除咗上面講嘅打機同做運動之外,其實都可以同伴侶一齊學吓新嘢,例如學一種新語言、新技能,咁大家共同話題同埋見面嘅時間都會多咗,感情自然會升溫啦~不過現代人生活忙碌,要一齊學嘢嘅話,最好搵樣大家都有興趣又夾到時間學嘅嘢~咁就唔會嘥錢嘥時間啦!

8)如果你哋係因為見得太多太密,而慢慢覺得悶同淡嘅話……
咁你哋就要同另一半坦白,提出想要返多d嘅私人空間。但要記住一定要同時比到安全感對方,例如同佢講吓同朋友去邊度食飯、去邊度玩;講吓當日發生咗d咩趣事或者唔開心嘅事等等~千祈唔好收收埋埋呀!要記住情侶間有返適當嘅空間,咁先係一段健康嘅關係呀!~

好啦!哇,寫寫吓原來寫咗咁多~希望呢d方法可以幫到大家啦~
如果大家覺得呢d方法有用嘅話,可以幫手share出去,等多d情侶都見到呢個post,咁就可以日日都keep住sweet sweet啦~!^^

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→