遇到差到貼地的工記得勇敢辭職

生活練習 於 17/09/2022 發表 收藏文章
以前既我係好橫衝直撞,
我要多謝過去既我造就今日既我。
有啲野我唔會再重蹈覆轍,
有啲野知道唔適合自己,我識得做更好的選擇。

——謝安琪



我成日都好懊悔我第一份全職竟然做咗三年先辭職。
個一份係一份勁難頂的工,
福利差,人工低,人事關係複雜卑鄙,
射波、篤背脊、推卸責任,咩衰野都有齊曬,
差都唔可以再差。
但當時的我,好驚再去面試,家人亦唔容許我祼辭,
於是足足拖了三年我先辭職。

當中最難頂既係遇到好差好賤格的同事同上司。
佢自己做唔切野,就臨時唔俾我放假;
佢自己新年先斬後奏要放假返鄉下,
就態度勁差勁咁迫我年三十要返夜班;
張檯既野唔係我放既,就用點妹仔的惡劣態度同我講:
「同我執返好張檯。」

老細亦係剝削的高手,
要我免費OT去幫一個HEA底同事,
要我返曬全部的夜班去俾其他同事返學,
同我講呢個世界係無公平呢樣野。

每次想起呢份工的痴線經歷,
我就又嬲又懊悔,好痛苦,真係好痛苦。
點解我唔一早就辭職?點解我無呢份勇氣?
搞到受咗三年的氣,
之後仲要用唔知幾長的時間去梳理當中的情緒,
成為長時間的人生陰影。

當時無人俾我傾訴,
無人陪伴我同行,
我只能自己一個孤獨咁默默忍受呢一切,
直到最後頂唔順就黎情緒病發,
我先可以係家人容許下離職。

呢三年的痛苦經歷,我到依家都仲未完全釋懷。
唯有同自己講,我以後唔會再咁傻,
遇到變態的工作與同事,會識做更好的選擇——立即辭職。

留言


請按此登錄後留言。未成為會員? 立即註冊
    快捷鍵:←
    快捷鍵:→