甩碌自由行 ~ 自由行的甩碌分享

Beauty Life 於 17/09/2019 發表 收藏文章
香港人去旅行,好多都鐘意自由行,因為唔使俾人趕鴨仔,仲可以去自己想去既地方
不過自由行之前的準備功夫真係好多,除左要買機票,仲要酒店,租車,PLAN行程同買入場卷,我自己就不嬲做開領隊呢個角色,由以前幾個朋友去玩,到後尾幾家朋友去玩既行程都由我一手包辦,自己去都還好,如果同埋一朋友去仲驚,驚安排得唔好,成班人企哂係度都幾煩

今次就想同大家分享下呢D甩碌野,當係一份自己既NOTES 又好
當俾大家參考下都好啦~

訂機票

好多時大家都會上網直接訂機票,但香港依家好多航空公司,又多班機
要每間航空公司去查真係好煩,家下有D網站可以幫你LIST哂所有航空公司的價錢,一目了然,可以慳番唔少時間

最成功的一次就係今年新年寒假用左四千幾蚊就可以買到一家3口來回韓國首爾的機票


但我試過最瀬野一次係去錯日本機場

話說有次係網上訂機票去日本時只顧睇時間,以為來回都同一個機場,回程時就瀨左野,去錯機場,搞到要買多次回程機票,成個TRIP 貴左幾千蚊

所以如果大家係網上買機票時記得要睇清楚
同埋要一D 容易睇,無咁易睇錯的網站

租酒店

如果去一D熟悉既地方而又有哂行程既,有一D網站有酒店加機票的優惠架
不過你要先PLAN 好行程,肯定酒店會方便出入

租酒店的甩碌事
話事有次我去廣州自由行,係酒店網訂左酒店,臨出發時突然心血來潮,打去酒店問
點知酒店搵極都搵唔到個紀錄
死火啦,成四家人跟我去旅行,唔通要瞓街咩,好彩即刻打去酒店網問
先知原來CONFIRMATION 上的號碼同網站同我之間既號碼,而酒店係用另一個訂單號碼
所以我依家如果去自由行,可以的話都會先打去酒店查一次個booking ,以免到步後要搞好耐,甚至無BOOKING呀


另一個酒店甩碌事係發生係剛剛8月
同朋友入住東莞既酒店,發現原來個泳池要1.5米高先可以游得
但我地有5個小朋友,即係........空歡喜一場
可以的話,記得查清楚酒店的設施規則,尤其係親子遊
所以訂購酒店一定要搵D信譽好,唔會突然搵唔到紀錄的網站呀~

租車

租車好多時都會搵番熟客介紹一D私人司機,諗住用過實無錯

今年去韓國既甩碌租車就係係網友介紹既私人司機,落左機聯絡佢,先收到通知話架車半途壞左,而佢因為一人司機,無車隊,等左45鐘都搵唔到另一架車入機場
最後我地要用貴左3倍既價錢係機場坐車去酒店~@@

所以如果大家租車時建議可以租一D大型少少的租車公司,IN CASE 個司機有咩事都可以搵到替代司機呀~

預購門劵

大家去自由行,好多時都會預售門票,預售門票可以免除去到再排隊的麻煩
我上次去東京迪士尼都係買預售門劵,入閘好簡單
門劵有埋QR CODE,去到一嘟就入得~


我既甩碌野就係去韓國買左首爾樂園 Seoul Land既票
大安旨意用電話 SHOW QR CODE 就得
點知去到,樂園要求我出示列印出黎CONFIRMATION.

唔是化,家下仲會咁落後架咩?
最後搞左好耐,同佢講左好耐先終於搞到,浪費哂d時間
所以大家買左咩野既門劵最好都影埋出黎以防不時之需~

不過如果同細個既小朋友去韓國,我極力推界去首爾樂園呀
因為個D除左有大型機動遊戲,仲有好多啱小朋友玩既兒童機動遊戲
我當時係2月去,成個公園好少人,基本上咩都唔使排隊,爽到爆燈
呢度12月-1日仲有得滑雪兜架~~


之前我去左韓國既米田共和國 同埋日本既藤子藤子不二雄博物館
都係先係網上買左門劵再去,非常的方便呀~


Local Tour

自由行,好多時都會跟一至二日 Local Tour ,有車接送唔使煩交通,一日去多幾個景點都得
尤其一D大城市或去滑雪,路程比較遠,坐車唔太方便
跟Local Tour 就最方便啦~!


甩碌係上次我跟左一個LOCAL TOUR 去一日滑雪團
諗住第一次帶小朋友滑雪都唔使上山頂啦
於是就無買纜車證,點知坐巴士時帶團教練話就算BB滑道都要纜車證
結果又要臨時買纜車證 (當然係貴過預購啦) 
但個個BB滑道其實都唔太BB,同行5歲小朋友同家長都上唔到去玩
而我女8歲,都係試左一次都唔敢再上去玩了

所以買 ONE DAY TOUR 最好揀D明碼實價,有哂詳細行程
到時唔使突然再另外收費,以免有失預算

而小朋友太細,去滑雪其實都好難上到山玩 (淨係坐個纜車要落地個下都搞唔掂啦)
係平地試滑下就夠啦~

自由行其實都幾多甩碌野,不過有時呢D甩碌野都係旅行回憶既一部份
開開心心去面對,仲會成為以後歡笑的回憶架

祝大家旅程愉快~甩碌無哂~

文章只屬個人意見,效果因人而異,只供參考

如要聯絡本人,請電郵至: smonkichi@hotmail.com

Fanpge : www.facebook.com/smonkichi

Instagram : https://instagram.com/smonkichi/

Click below for my sharing platform :
Blogspot * She.com * Elle * U Beauty * Beauty Exchange * Beautylife

* We Share * Beauty Qooza * Baby Kingdom * ESD Life 生活易 * Fanpiece * The Ztyle

留言


請按此登錄後留言。未成為會員? 立即註冊
    快捷鍵:←
    快捷鍵:→