女人永遠唔會覺得自己夠靚 精選 推薦

「啊邊個邊個真係好靚⋯⋯」Kelly同我講。其實我都係月頭先識佢，已經聽佢讚人靚讚咗幾萬次，對象包括明星、歌星、同班同學、甚至鄰居林太個女。

而我一識Kelly嘅時候，第一印象就係：嘩呢個女仔好靚！靚到我夜晚都有同男朋友講：「喂我最近識咗個女仔呢，佢真係好靚。」就好似kelly依家咁。

係Kelly同我講緊人哋有幾靚嘅時候，我又收到好朋友Jaecee嘅whatsapp，佢send咗今年中華小姐亞軍張相比我，外加好多個喊樣emoji。
「唉人哋真係好靚啊，點解我咁醜樣㗎⋯⋯」
我都好同意林宣妤好靚，但係你點都唔會係醜樣啩，你由中學出名靚女到大校都係校花喎。

「喂其實呢，點解咁多靚女成日都話人哋靚，但佢自己都唔差丫。」男朋友好認真想同我討論呢個問題。
「學術討論？」我問。
「係。」佢個樣好認真。
「嗯⋯⋯首先你要清楚女人構造，呢種生物永遠都唔會夠安全感。」之前有個test係睇下上帝創造你落咗咩，好似有咩幽默感啊靚女啊⋯⋯但，呢啲都唔重要！我想講嘅係，佢應該落漏咗安全感。

雖然我都同意女人唔應該為男人而活，但無可否認，女為悅已者容，好多女仔朋友對於自己外表嘅要求，都係源於怕自己無人要，又或者男朋友唔要自己。
作為一個肥妹仔，我都成日問旁邊的肥仔：
「死啦我會唔會太肥？你會唔會唔再鍾意我㗎⋯⋯」
「唔會，你最好肥啲，咁就唔會有其他人同我爭。」
「我真係好滿意你個答案啊！」我笑得好開心。

可能你會覺得講野甜啲又唔駛成本，個個都講到㗎啦，點解女人仲會take it serious？呢個係男人同女人天生嘅分別，男人大概永遠都唔明女人情緒可以有幾敏感，可以因為你一句野牽起幾多情緒波動。大眼雙眼皮嘅又覺得單眼皮好似型啲，單眼皮嘅又羨慕雙眼皮大眼好有神，無人會永遠覺得自己最靚，但我諗，如果身邊嘅人永遠都覺得你最靚，我自己覺唔覺自己係全世界最靚真無唔重要。

「啊其實你都真係好識講野～」我好似隻樹熊咁攬住呢個男人。「如果講一兩句野可以令你安心啲，點解唔講？更何況你係我心目中點都係靚，呢句係真話。」佢嘅語言藝術已經同騙徒無異。

如果你身邊有一個成人怨自己唔夠人哋靚嘅女朋友，其實成個問題好易拆。

攬住佢，講句「但你係我心目中係最靚㗎！」。當你講咗呢句，佢就唔會再糾纏係呢個問題上面，因為世界上其他人點講都唔再重要，因為你就係佢全世界。