【講其他】經一事,總會變蔡一智。

我的前度 於 13/08/2016 發表 收藏文章

步進餐廳,一眼便找到我阿sir,不是因為他揮手,因為他的頭很大,很容易見到。

對面坐著的是三年多沒有見的朋友,不要誤會我倆不熟,只是她去了澳洲工作假期一年,回港重色輕友了兩年,結果便沒見三年。

見阿sir揮手,擰轉身見到在餐廳門口的我。大家樣貌沒變,只是樂觀的她,今晚多了兩行眼淚。

點解咁得閒搵我地呢?

不錯,她失戀了。
_______________________________________________________________________________________

我好肚餓,朋友欲言又止,我就只顧著點餐,聽她和阿sir伊伊哦哦。

「要個炒金邊粉,凍檸茶少甜,加多個甜蜜香蕉船,後上呀唔該」

「香蕉船咪香蕉船,點解要加埋甜蜜呀」我失蹤三年的朋友問。

我心裡面既台詞係:「_!我點知呀!香蕉船係甜既,餐廳老闆曾志偉詞窮諗唔到名掛!叫香蕉船又太普通,加多甜蜜兩個字先對得起個價錢掛?!」

「哈哈!名黎既者」呢個係我真實台詞。

朋友只點了一個花茶。

「我好多日無食野了,人只要有飲水都死唔去既」難得她還有心情自嘲。

「你減肥者下嘛?係咪直接講」我呢個忍唔到口既減肥失敗者,望住瘦左一圈既佢,忍唔住串左佢一下。

今天食飯不是重頭戲,阿sir識玩塔羅牌,朋友是找阿sir指點迷津的。

「你玩唔玩家?」朋友問。

「下」含住啖金邊粉的我好疑惑。

我明,她一邊又很想有個答案,但另一邊又好怕知道答案,所以想我身先事卒。

求其抽了張牌,然後到我朋友了。

不知道是害怕還是血糖低,她手震得好厲害。抽牌的時候還低下頭,樣子十分誠懇,根本是在黃大仙求神問卜的情境。

_______________________________________________

開牌。

總共七張牌,有六張都是只見一個人的牌,他們兩個對望,停頓了幾分鐘,我依然食緊我既金邊粉。

其實重點是其中一張牌的畫是有幾個人,有幾個聖杯。

「你地之間有第三者,係有影響到你地關係,已經係出現左」我sir說得很淡定。

但我朋友當然淡定不了,開頭我不斷問發生什麼事,她都只是支吾應對,但呢刻她再沈不住氣。

「我都估到家啦,近排又轉style,又話要出街,佢平時都唔出街既」

「我問佢係咪有第二個,但佢死口都唔認」

「其實我都估到係邊個,我俾你地睇下個女仔Facebook」

她連珠炮發,我就食住金邊粉睇她獨腳戲。

說著,她用冷衫袖抹走眼淚,她上學的時候都很愛穿冷衫,怎想到當天很樂天的她,有一天會在我面前哭,何況當初雖然她重色輕友,但還是很高興當初我眼中的小妹妹找到她的小幸運。

我終於放下我的金邊粉摟著她,她真的瘦了很多。

她一直都說了很多,但我都沒有太多回應,因為我知道她一定是很傷心的,但旁人如我做的只有陪伴,要走出來還是要靠她自己。

「你覺得佢係咪有第二個呀?」她問我。

好多野,你問出口,你覺得佢係一條問題咩?答案你心中有數。但我講唔出口,都係食返我既金邊粉。

原來月尾還有個日本旅行,她明知會傷心,但仍然想去,想見多一面,想過最後一個開開心心的旅行。

「我知我地無可能家啦」

「你問心,你真心答我,你其實係咪覺得仲有機會?」我終於推開碟金邊粉。

她不語。

「咁我上唔上去佢屋企拎返啲野好呀」

「緊係拎啦,你唔拎,佢點有位放新女啲野?」

「 我唔想佢有新女呀」

「傻豬,你再唔執,人地新女都會掉左你啲野家啦」

就係咁,我不斷仙女撒鹽咁不斷響佢傷口敷上厚厚既鹽。

撒鹽響傷口係會痛家,但希望你有一日會Google一下,鹽有消炎殺菌既效果,可以幫你更加快癒合個傷口,癒合進度如何,就要靠你自己啦。

________________________________________________

食完個甜蜜香蕉船就由銅鑼灣行返屋企,我習慣沿住駱克道行返去,即翠華果條街。
我一路行返去,一路望下周圍,呢條路我同過好多人行,沒有太大改變,沒有太大思緒。行到759的Kawaiiland我先發覺,其實呢度變左好多,只係成日都經過,一路望住個變遷,先覺得無太大改變。

其實人都一樣,以為自己無變,其實大家都一路變左好多,不論好壞,都係一個成長。

回想起,自己已經改變了很多。

你呢?

霓虹燈下照著影子,但你我都找不到回憶的據點,誰又取代了當天位置?

始終一天,我會放棄再講。

始終一天,你也會放棄再講。

________________________________________________


啊!唔記得講,鹽可以消炎殺菌,但去唔到傷疤的。

_______________________________________________________________________________________

誰沒兩個致命舊愛侶?

如果有心事,不妨在Liza姐Facebook專頁放低
https://www.facebook.com/sisterliza/


________________________________________________

留言


請按此登錄後留言。未成為會員? 立即註冊
    快捷鍵:←
    快捷鍵:→