2012年8月1日，
「醫生話Jason過唔到今晚⋯⋯」一見到Whatsapp便換衫衝了出門。
跑到軒尼詩道截了的士：「瑪麗醫院呀唔該⋯⋯」
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
下車之後，臨上去之前我在醫院的正門抬頭看了一看Jason住的樓層，本是很趕的，但我放下了腳步，慢慢上去。
電梯打開了，一堆人聚在走廊，不是垂頭的，就是哭泣的。唉，我就是怕見到這一幕，行得再慢，再不願見到，還是意料之內。
我跟幾個中學同學就一直在門外守候著，或者大家等的可能是見最後一面，但我守候著一個奇蹟。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
早在一個月之前其實就知道他做換心手術，之前醫生開了一個期限，最後終於在期限前有個豐澤的售貨員猝死，家人同意捐出屍心，Jason才有適合的心臟做移植。手術成功，他妹妹在Facebook報平安。
最後還是要出現劇情經常出現既果幾隻字：好境不常。
醫生話Jason有排斥的情況，還有細菌上腦，7月31日我們第一次聚集在瑪麗ICU。
兩個一組入去探望，我一入去，只見Jason還用紗布蒙眼，膊頭上還有手術殘餘的黃色消毒藥水，旁邊有部機器，應該係人工泵血工具，還有身上插著大大小小的喉，右後腦腫了一大舊。
我腦海只回想起年頭Jason生日的時候因為陪男朋友，所以沒有到場。
眼前的情境我只不斷想起當時說：「你下年生日我再黎啦」
Jason的心跳只有四十幾。
同學拉我到床邊，一早喊到收唔到聲既我終於爆了，
「對唔住呀，我唔知原來係等唔到下一年，對唔住，我唔知你原來病得咁嚴重⋯⋯Jason⋯⋯你聽唔聽到我講野呀⋯⋯嗚⋯⋯Jason⋯⋯」
其實我自己都聽唔到自己講咩，但我見Jason有掙扎幾秒，好似想起身咁，我望了我同學一眼，因為我以為我睇錯。
「你睇下，我都話佢聽到家啦」我同學說。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
Jason的心跳到今晚只有二十幾。
我好怕又好似上次喊到收唔到聲，我怕我講唔到我想講既野，所以先在電話既memo預先打好想講既野。
終於到我，sorry⋯⋯結果我都係喊到收唔到聲，反而佢媽媽較為平靜。
結果我同學幫我讀出。
「Jason⋯⋯我知道你承受緊我地想像唔到既痛楚，其實今晚到醫院既時候，人地等緊見你最後一面既時候，我仲依然等緊一個奇蹟，但尋晚醫生叫我地黎見你既時候，都已經叫我地要有心理準備。然後我又回想，突如奇來既屍心，手術成功，其實一路以黎，呢個已經係一個奇蹟。你撐左兩日，我知你其實真係好痛，我知你已經好叻仔⋯⋯其實生死唔係你可以控制，想見你既人其實都到晒，見晒，你好叻⋯⋯放心，我會將你個妹當做我個妹⋯⋯唔好擔心⋯⋯」
「放心啦，俾時間媽咪就可以家啦⋯⋯唔好擔心我地⋯⋯媽咪會無事⋯⋯」Jason媽咪在Jason心跳跌到十幾的時候說。
真的在沒多久之後Jason就離世。
當時是2012年8月2日的凌晨四點。
我與同學步出醫院，抬頭一看，是月圓之夜，很諷刺。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
我沒有回家，一早已經有阿恩家鎖鑰，所以我直接去了阿恩的家，一開門，便見到阿恩坐了在沙發等我。
然後直接上了床訓，好攰，我指心靈上。
訓教既時候，阿恩一定會用手臂當做我枕頭，手拖住手訓。
有阿恩的陪伴，總算個心比較定。
每個月既2號我一定會同阿恩講返句：「2號快樂」
但今日我真係講唔出，因為今個月既2號⋯⋯真係唔快樂。
抱住阿恩，我心存感激，感激他一直在我身邊，亦感激他仍然生存。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
寫與前度的故事是順時間寫的，上一篇寫到買戒指，我想是時候再出一出文，然後我再想那個時間之後有什麼可以寫，我看一看日曆，原來又差不多到八月二號，所以想紀念一下這位朋友仔。
今篇文章沒有金句，沒有提及太多前度，但很深刻的事，原諒我無考慮到閱讀的趣味性，只記錄了當時的事，當時的心情。
原來分開都不是太差，因為至少我的最愛還與我同一天空下，還好好生存。
願你我都學識珍惜眼前人，致自己。
致，
Jason。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
誰沒兩個致命舊愛侶？
如果有心事，不妨在Liza姐Facebook專頁放低（click here）
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
請按此登錄後留言。未成為會員? 立即註冊