二寶出場~~最後一次的生產記

明太子與啫喱 於 29/12/2020 發表 收藏文章
不經不覺細佬咁就滿月啦~~

回想返,21/11當日下午3點幾開始見痛,但我都一直無為意,直到去到4點幾,先開始覺得唔對路,拎個⏱timer計一計,先發現10分鐘痛一次,於是立即去沖涼洗頭,call車去醫院。

接近6點去到醫院樓下,行多幾步已經穿水見紅,裙都濕埋,上到病房檢查,先至話得1度....唔係呀.....🤦🏻‍♀️
好啦..種完豆又等呀等....去到接近12點,就換手術袍轉房坐波波。

坐到近2點半,助產士就叫我除哂衫訓上床檢查,先得2度🤦🏻‍♀️......呢個時候,我開始心情緊張,仲叫助產士可唔可以幫我打止痛針,但助產士話開到4度就會落產房,佢仲問我係唔係好怕痛,我話都唔係,我好忍得痛,不過我真係好緊張(緊張到喘晒氣)。跟住我要求老公入嚟陪產,但等呀等...助產士一直無叫佢入嚟...

大約3點幾,真係好痛😖(不過我都仲hold到,無叫到,只係不停集中精神控制呼吸)突然間駁住我個肚嘅機器突然響alarm,助產士一睇,立即大叫,另一個助產士立即打電話,我都心知不妙😨,佢地立即推我去產房(個速度係要用「跑」同「衝」去形容🏃🏻‍♀️🏃🏻‍♀️),我聽到佢地講:8度啦!

一入到產房,好多助產士圍住我,就咁望最少都7-9個,一轉床就叫我立即痾,要快,BB心跳跌緊。呢個時候唔知係我太緊張定咩原因,我啲手、腳、身體好似唔太聽洗,好似抽筋咁完全控制唔到咁,而我聽到助產士係咁講:唔得呀!未落盆呀,好高呀!

跟手佢地就要我簽定緊急文件,然後叫我再試多幾次睇吓push唔push到,一路push嘅時候,就聽到好多液體飛濺嘅聲。後來最後要4-5個助產士㩒住我,先push到出嚟。

排出胎盤後,我聽到個助產士話唔知點解止唔到血,又話胎盤好似唔完整...我又見到啲助產士話:好多血,攪掂後要換衫(我見到佢地個身好多血跡)總之攪咗好耐,痛咗好耐(打咗麻醉針,但都仲係feel到聯針嘅痛)。

早上6點幾終於上到房,我已經覺得好暈,成個人都好無力,食嘢都無力。
真係無諗過生二寶會咁辛苦,復原速度亦比第一胎慢(我都係前日先開始可以停食止痛藥)。但我感謝主讓我人生中再次經歷呢個難忘嘅生命之旅,讓我同細佬都平安。

最後,要衷心感謝威爾斯親王醫院嘅醫生、助產士、產後病房所有姑娘及工友,因為產後佢地每一個都幫助我好多,每一個都好親切,盡量俾我有好多休息空間,無言感激

如果喜歡我們的文章,請即分享到︰

標籤: 懷孕  生產  

留言


請按此登錄後留言。未成為會員? 立即註冊
    快捷鍵:←
    快捷鍵:→