跟朋友去旅行遇上的十種壞情況‏

窮得只有夢 於 26/11/2015 發表 收藏文章
跟朋友去旅行是件開心事,不過如果遇上不合拍的朋友,原本的興奮隨即變成了嬲嬲豬。以下的情況,你們又可曾遇過?然而這種苦惱有誰共鳴?

1.旅行地點拗一輪
有一天,在Whatsapp Group提出跟朋友們去旅行,朋友們都興高采列地和應着。不過談起旅行的地點,每人都意見不一。

「喂,不如我哋去台灣啦?」我說。
「吓,唔好啦!B同C今年先啱啱去完台灣,去啲未去過嘅地方啦!」A說。
「咁去泰國啦,大家都未去過!」B說。
「吓,唔好啦,泰國前排有危險喎,去啲安全啲嘅地方啦,不如去英國啦!」二世祖C君說。
「吓!但係我哋冇咁多假期同錢喎!」我+A+B君齊聲說。

(下刪1000字的討論)

是咁的,由於旅行地點未定好,結果宣布泡湯。

2.度期度極都度唔到
某程度上,跟朋友去旅行,如果能夠定好日期,可以說是達到成功的一半。奈何這一關很多人都未能通過,然後只能低嘆「唉」一聲。

「喂喂,去旅行囉,我哋快啲定日子,咁可以捕平機票嘛!你哋邊個月得呀?」我在Whatsapp Group興奮地問。
「一於淡季9月去啦,一來平啲,二來去到嗰度冇咁多人,唔駛同人迫!」B說。
「淡季去?我冇咁多假呀!復活節去啦,可以用埋啲紅日假!」有米C君說。
「哇!復活節去好貴喎,我唔想咁貴呀!查實我得番兩日Annual咋,不如我哋去星期五、六、日、一,咁我就可以拎兩日假就得。」A說。
(下刪1000字的討論)

是咁的,由於旅行日期未定好,結果宣布泡湯。


3.總有人甩底
當你紋盡腦汁度到一個天衣無縫的檔期能夠滿足所有人願望後,突然在網上發現天降激平機票。這個時候,你的內心久久不能平伏,然後立即知會你的團友。

「喂喂!捕到平機票,仲要唔駛一千蚊就包晒所有嘢!你哋只要一句OK,我就立即買喇!」我說。
「m.......因為我有同事放緊產假,公司未必可以畀到我放假,我諗我去唔到,不如你同佢哋去得開心啲啦!」A說。
「其實呢‥‥‥我都想試下自己一個去旅行‥‥‥不如下次先同你哋去囉!」B說。
「吓,既然咁少人去,咁不如下次先?」C說。

此時此刻,你除了無語之外,都不知道給他們什麼反應。由於有團友甩底的關係,繼而有團友相繼退出,結果宣布泡湯。

4.總有團友懶得Plan行程
好不容易,時間、地點都定好,接着就是計劃行程的部分了!事前向大家提出約一天出來計劃行程,團友都諸多推搪!

「你哋Plan得啦,我份人好隨和o架,你哋想去邊,我就跟住你哋去邊!一於咁話啦!」A言之鑿鑿的說。

結果旅行期間‥‥‥

「吓!點解會住呢間酒店o架?又貴、交通又唔方面,仲有呀,點解行程冇Shopping時間嘅?搞錯呀!!!!!」A說。

又要怨,又要不願計劃行程,遇上這樣的團友,真的食龍肉都冇味。


5.失暈團友攞你命三千
旅行的日子終於來到了,你的心情也愈來愈興奮!約好了早上8時在機場集合,總有一、兩個會遲大到。
遲到都算,最攞你命三千的,不是對方忘了帶Passport,定是Passport過期。如果你是單獨跟那位朋友去旅行的話,那時那刻,你不知道留下來陪他,還是實行一個人旅行。「最怕遇到豬一樣的隊友」,原來是至理名言。


6.陌生團友突然出現
曾經聽過朋友A分享她旅行的故事,與三五知己去旅行,去到機場集合後,突然看見朋友的父母都來了。本來以為對方的父母「如此難離難捨、想抱緊些」,誰知細心看一下,原來她的父母都帶了行李廂。當時朋友A立即用眼神向對方問個究竟,誰知對方笑笑口說:

「爹哋媽咪都話想去,你哋唔介意可?」

是咁的,去旅行就是想一班年輕人瘋狂一下。帶家人來又不知會一聲不突止,行程方面又要遷就對方的父母,最重要的是去蒲、去放縱、說黃色笑話也被長輩監控着,令整個旅行都淪為「乖乖旅行團」。


7.遇上「相見好,同住難」團友
俗話有云:「相見好,同住難。」這句說話,可能在你跟其他朋友去旅行之後,會深有體會。

-有一種團友,約好了9點起床趕行程,但叫極他/她也不醒,賴床至少3小時。
-有一種團友,當正自己是一個人住,用洗手間足足用2粒鐘,然後房間的人都不斷鼓譟,大叫:「究竟幾時到我用呀!」
-有一種團友,骯髒程度嚇到你傻,在床上吃東西,然後食物的汁液亦跌至床上雪白的被上,此時,意識到要跟對方同床的你大叫:「喂,你咁烏糟,我點瞓呀?」而他/她也只是施施然回你一句:「吓!我喺屋企都係咁!」


8.窮團友 V.S. 富團友
跟朋友去旅行,為方便結帳,通常都會設立一個公數基金。奈何一出現公數,爭拗就愈來愈多了。

「喂!我唔想食咁貴呀,食呢間車仔麵,又平又多餸!」窮團友說。
「吓,咁辛苦去到旅行,梗係要食最High Class嘅食物啦,呢間酒店嘅自助餐係呢個國家入面最出名,個廚師仲成日上國際飲食節目,唔係唔試吓嘛!」富團友說。
(下刪1000字的矛盾大對決)

看見窮團友和富團友你一言我一言,真心想說一句:「不如食自己囉!」


9.「方向白痴」爭話事
很多人去旅行都喜歡自由行,多於參加旅行團,因為多了一份探索的刺激感。但探索還探索,識路也是王道。有一類團友天生是方向白痴,奈何又喜歡話事,那麼你可以怎樣做呢?

「喂,Google Map話唔係咁行喎,應該行右手邊,行左手邊距離我哋嘅目的地愈來愈遠!」我說。
「信我喇!5年前我嚟過呢度,我記得點行喎!」路痴B君說。
「喂‥‥‥唔係喎!不如我哋問下人啦!」我焦急地說。
「搞錯呀!你即係唔信我啫!‥‥‥X#$%︿$%」路痴B君嬲爆說。

跟着他走是死路,不跟他走又是死路。這個時候,搭的士可能也是生路。


10.同行有瘋狂、自戀、喪拍照也未夠喉團友
去旅行拍照是人之常情,但如果你有「拍照成狂」的朋友,就要有心理準備了!到北京旅行,來到了長城,大家都非常興奮,因為「不到長城非好漢」!於是,團友們都紛紛留倩影,高炒、低炒、自拍、背影、剪影通通都影齊,而且長城的每一段都要拍下不同的拍攝模式,誇張程度爆燈!

「喂!我哋要快啲行啦,如果唔係趕唔切去下一個行程。」我焦急地催促着。
「唔得呀!頭先你影嗰張相影到好Hea底,影到我超肥,你快啲同我影過至得!」
「你估你係Model咩‥‥‥」你心想,但沒說出口。

結果,光是拍照,由天光拍到天黑。而一整天,都只是逛了一個行程,認真無奈!


看到這裡,會不會覺得,跟朋友去旅行由始至終都是一場惡夢?又會否令你有衝動一個人去旅行?我想,只要你帶眼識人,找個跟你有相同想法、合拍的團友們,相信跟朋友去旅行也可以很快樂。

如果喜歡我們的文章,請即分享到︰

標籤: 旅行  朋友  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→