選科年既反叛期

大小姐升上中學...我倆已經擔心反叛期...
自己年青過反叛過...好明白到時到候自己想長大...
想得到人認同...想自己有話事權...
樣樣事想自己攪掂...唔需要其他人幫...
屋企人係唔會明白我...只有朋友明白我...

自從二小姐出世...大小姐其實已經有無聲無息既變化...
有時會感覺她對妹妹有點關心...
有時會感覺她對我倆有點厭煩...開始覺得她不像以往咁聽教聽話...經常駁咀...
一言九鼎...激到我倆一肚火...
對我倆既決定抱有懷疑...寧願去撞板...唔願去相信我倆...
只要係我倆既意思就不惜一切去唱反調...務求要對着幹...表達我有自己既諗法...
經常我倆講一句就駁足九句...唔會理我倆講得岩唔岩...真係嘔血...

中三學期一開始...我倆已經關心大小姐會選修既科目...
大小姐打算選修商科...不過...以我倆認識既她...並不適合選修...
細問之下...原來...大小姐係同高年級姐姐討論過而決定...當我倆再追問落去...你知唔知讀咩架?你知唔知之後點行架?
樣樣答唔知...咁點放心俾你自己決定...
我倆提出選科要考慮既因素...
大小姐就表現出一副不耐煩既樣子...咀面令人討厭...
面對住大小姐既態度...我倆就連珠發炮...
最後...不歡而散...

大小姐正值學習獨立思考既時期...有着好多想法...
不過...因為她既想法未見周詳...好多時會被我倆否定...
一個又一個既否定...令到我們既關係變得緊張...

大小姐的反叛期唔知幾時會完...
我倆只有改變策略應對大小姐...我倆要互相提醒大家...唔好讓大小姐產生憎恨...
用商量形式去引導大小姐說話...讓大小姐知道我倆會尊重她既意見......
放下父母既威嚴...多聆聽大小姐說話...讓大小姐表達自己意思...
等大小姐唔好因為怕我倆而唔敢講...
有時越壓迫就越反抗...後生過就一定明...
我倆要多點鼓勵大小姐...讓大小姐肯定自己既價值...
等大小姐知道我懂得欣賞她...
講到底...我倆是很愛她...
在我倆心目中...星月叫做聽教聽話...
現在的她只是經歷反叛期...想自主...想獨立...
我倆只是捨不得她長大...

回想起大小姐小學開學...一個細小的身影背住沉重的書包...
我曾經以為六年小學生涯好漫長...
原來...小學生活轉眼就過去...
一上中學...大小姐已經慢慢唔再需要我...伴讀書僮的日子靜悄悄咁結束...
從前我會諗幾時可以甩身...不過...甩左身又覺得周身唔舒服...
趁住大小姐仍然肯我同分享學校生活...我會好好珍惜...
因為...唔知幾時...大小姐就會收口...

經過一次又一次跪地餵豬乸...
大小姐終於肯開口同我倆講下對選修科既想法...
我倆明白她想自己決定...
只係...我倆諗得比她多...
希望她能讓我倆比少少意見...讓她可以諗得周詳少少...讓她再仔細諗諗再決定...
二月二十六日...試選表已經交左...選修科已經暫定了...
最後未有選擇商科...選左一文一理...
而真正選科表會係三月大測後提交...俾同學仔有一次機會修改意願...
正好讓大小姐睇下測驗成績再決定...
書係大小姐自己讀...我倆只能夠提供意見俾大小姐做一個參考...待大小姐做最好決定...

FACEBOOK 專頁 : https://www.facebook.com/mrmoon.renelee
INSTAGRAM ~ MRMOONMOON

聯絡我 ~ bbg1668@yahoo.com.hk