人生點都要試一次渡海泳。

毛言地 於 28/07/2018 發表 收藏文章
  要搵一樣最有香港味道,可以比一大班人參與嘅運動,非渡海泳莫屬。
 
 
  自1906年開始,至今已經過百年歷史嘅維港渡海泳可以話係見證住香港嘅變遷,甚至每個停辦原因都記錄住影響香港嘅大事:香港淪陷、尖沙咀火車站拆卸,而曾經嘅終點就係皇后碼頭。有人將參加視為習慣年年報名,有人游到年過古稀一樣熱情不減,因為渡海泳唔單止可以強身健體,更加係香港嘅其中一項歷史回憶。
 
 
  由香港業餘游泳總會主辦嘅「新世界維港泳2018」將於今年10月21日(星期日)維多利亞港舉行。由於歷屆報名愈見踴躍,大會今年將比賽名額增加600個至3600個,並將於8月9日截止報名,令更多人可以參加依項盛事。就算唔識游水,企喺賽道兩旁為參賽者打氣,感受當中熱烈嘅氣氛,都係一個唔錯嘅選擇。
 
 
  雖然渡海泳有咁多吸引嘅地方,但大家都要量力而為。游水需要一定體能要求,而渡海泳比起泳池亦會更受天氣影響。就算主辦單位已經安排咗大量救生員同小艇救人都好,如果大家平日冇游開水,或者每次只係游到幾個池就攰的話,今年就做住岸邊支持者先,過兩年練好再參加都未遲。
標籤: 毛言地  渡海泳  香港    

留言


請按此登錄後留言。未成為會員? 立即註冊
    快捷鍵:←
    快捷鍵:→