《你係女人,但我唔一定要就你。》

毛言地 於 16/05/2018 發表 收藏文章
  人有慣性,有啲嘢習慣咗就當必然,就好似男人一定要就女人咁,唔知幾時開始變咗一條定律:只要你唔順女人意或者唔遷就佢,你就係冇風度,你就係一個衰人。
 
 
  但點解一定要就女人呢?
 
 
  一個男人一世會遇到好多個女人,如果個個都要就嘅話真係死都唔得掂。你知啦,女人好多都係唔講道理同小氣,有啲更加將依兩點發揮到極致,可以為咗幾個月前一件小事嬲你嬲到而家,或者唔理三七廿一都認定你錯。如果你對住依種女人,唔好話就唔就佢啦,唔同佢嘈已經好比面佢。最重要係咩?女人的確要錫,但只限真係抵錫嗰幾個——啊媽家姐,或者女友老婆。對住佢地你可以無限容忍,因為你地之間有愛存在;但其它女人?如果佢係過份佢係野蠻,有咩理由去忍埋佢一份呢?
 
 
  或者係佢比人就慣,或者係佢覺得因為自己係女人就應該要比人就,每個人身邊總有幾個視自己無理為理所當然嘅女人。望住佢不可一世嘅樣,聽住佢不可一世嘅語氣,你好明白如果你屈服嘅話往後就會比人當狗咁撚,但又怕自己企硬嘅話會比人當正係衰人。傻豬嚟嘅,女人自己都識講男女平等啦,如果你尊重女性就更加要平等對待佢,唔好搞咩特別待遇。何況你又唔係想追人,又唔係熱衷做兵,將自己搞到毫無價值做乜呢?
 
 
  某啲情況男人要睇諒所有女人係啱嘅:女人M到係辛苦啲,女人換水係艱難啲,依啲真係任何女性都會遇到嘅問題,但除此之外我就諗唔到仲有咩原因做男人一定要遷就女人。一個人可以值得尊重,可以要求人地遷就,但「我係一個女人」就肯定唔會係其中一個理由。
 
 
  當然啦,女朋友就另作別論。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
標籤: 毛言地  女人  遷就  

留言


請按此登錄後留言。未成為會員? 立即註冊
    快捷鍵:←
    快捷鍵:→