要搵人陪著你走真係好難。

　　點樣搵到一個可以一齊行落去嘅另一半係每個人都要面對嘅難題，唔好以為搵到人拍拖就搞掂：肯陪你唔代表對你好、對你好又未必會照顧你、照顧到你又可能會出去偷食。鐘意一個人唔難，但要同佢一齊行落去就要考慮好多因素，如果你仲停留喺一個覺得鐘意佢就可以排除萬難嘅階段（好似講緊以前嘅我），我都希望你真係做到依個不可能的任務。
　
　
　　你要對一個人產生好感唔難，只要對方喺外表、談吐、性格、學識等等是但一方面對你係有吸引力就可以。有好感嘅下一步係大家一齊出嚟睇個戲，食個飯，一方面見多啲對方進一步了解下，二嚟又可以比自己肯定下對對方嘅好感係唔係真。就算兩個人真係喺埋一齊，其實大家都只係用另一個身份繼續去觀察對方到底會唔會係陪住自己行落去嘅人選，因為人可以因好感而一齊，但絕對冇可能單靠好感就旨意兩個人風雨同路。相見好同住難，好多人拍拖甜甜蜜蜜，但一同居結婚之後就日嘈夜嘈。因為見面時間多咗，大家生活重疊咗，好多嘢唔可以再瞞住對方，或者應該講係大家都會見到對方日常生活上嘅缺點--即係你睇唔順眼嘅事。佢返到嚟唔會即刻沖涼但你接受唔到，你鐘意瞓喺梳化睇電視而佢又會有微言，大家生活習慣唔同，拼埋一齊就會有好多唔習慣嘅地方。　
　
　　唔好以為人生觀價值觀唔同會係令人行唔到落去嘅主因，日常生活種種意見分歧先至係當中最大嘅理由。就算兩個人政見唔同都好，最多新聞報道唔一齊睇，大家喺屋企做對不問政事嘅男女；但日常生活細節有衝突點算？單係馬桶廁板放唔放落嚟已經有排你嘈，唔通大家又分開兩個廁所，瞓覺習慣唔同又要分兩張床？分下分下，最後咪連大家都分開埋。當然啦，要搵個生活習慣一模一樣嘅人好難，但起碼要搵個人肯為你改，而你又願意比時間同耐心佢去改，某啲時候就要調返轉頭：你改，佢比時間同埋耐心。搞掂好廁板問題，仲有煮飯啦、家務啦、生細路等等，基本上兩個人一齊生活無論做咩都唔再可以你話點就點。二人世界，聽落就爽嘅，但真正遇到嘅時候你先知有幾多嘢煩。　
　
　　係人都想搵到另一半陪著你走，不過當兩個人到咗談婚論嫁嘅階段，愛反而唔係最重要亦唔係唯一嘅因素，聽落到真係幾可笑。
　
　
　　反正而家都未有人陪，我都係返去玩Switch先啦喂。
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材