世上有種女人，叫周永恒新歡。 精選 推薦

　　有件事我諗緊都唔明，就係點解香港女仔成日話要個點點點嘅好男仔，但總有女人一見到周永恒依種男人就會冇哂抵抗力。周永恒有幾衰？衰到連唔睇娛樂新聞嘅我都知佢點樣背住老婆溝女、打老婆再扮無辜，正如我點解會突然寫佢就係因為我尋日喺面書見到有朋友SHARE佢有新女嘅新聞。我冇興趣再寫周永恒嘅衰嘢，因為大家都知得比我清楚比我多。不過一個賤男能夠成為賤男，首要條件就係有一個兩個三個甚至更多嘅女人心甘情願咁比佢呃，而依一種女人，我會叫佢做周永恒新歡。

　　如果你問身邊女性朋友邊個鍾意賤男，我諗冇一個人會舉手，但身為賤男經典嘅周永恒身邊女伴唔缺，而且質素唔低。點解會咁？我只可以話佢地唔識死。「打女人嘅男人最不可原諒」喺女人最鍾意講嘅一句說話，但當遇到一個口甜舌滑外形又討好自己嘅賤男之後好快佢地就會同自己講「佢又唔係打我」，然後再催眠自己「佢唔會打我嘅」。原因？因為佢地覺得賤男今次真係鍾意自己。直到最後個賤男回復本性對自己嘅時候先會識醒，然後喊哂口咁話男人點衰點賤，班姐妹一味口裡為佢抱不平，結果冇幾耐之後就到個姐妹自己中招，成件事一直無限LOOP。
　　你話唔知佢係賤男所以比人玩弄感情，可憐；但如果你明知佢係周永恒但仲要痴埋去搞到自己一身傷的話，抵死。所謂本性難移，能夠浪子回頭嘅又有幾多個？連身為男人嘅我都唔會信周永恒依種人可以改過自新，連佢曾經嘅老婆都對佢心如止水唔再信佢，到底點解仲有女人會覺得自己就係可以改變佢嘅果一個？耐心同信任係要有，但應該比一個值得嘅男人；如果你覺得周永恒係值得嘅一個，咁你衰左之後就唔好話後悔。情況就好似你買一隻極高風險嘅股票你就預左輸到乜都冇，唔好到時輸哂先叫人比返哂本金你。

　　有時我同人講完而人地又唔聽，我會由佢，因為佢一定要仆過一次街先識痛。但係好多女仔身邊都有種周永恒式賤男，依種明眼人一睇就知道係深坑陷阱會令你仆到直一直，偏偏好多女仔好鍾意踩落去。唔通依種都算係愛情嘅魔力？望住班女仔平時所謂嘅要求，再望住佢地最後選擇嘅人，我唯有講一句：祝你好運。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/　　
Fanpiece：http://women.fanpiece.com/moyinday/