也許，每個人心裡的都是獨一無二。 精選 推薦

　　我知我有啲脫節，早前個個寫黃翠如式潮文我唔寫，係要到而家先寫。要我搵一個大家心入面都有嘅人其實好難，就好似我心裡面都冇一個人好似黃翠如一樣。又或者咁講，可能有一部份係幾似，但就真係得一部份咁大把。係咪每個男人都愛過黃翠如我唔知道，但我幾肯定每個人都曾經愛過其它人。愛上佢嘅原因並唔係因為佢似黃翠如或者洪永城，只係因為佢就係佢，佢永遠獨一無二。

　　雖然男神女神級好多人鍾意，但唔知點解往往令你墜入愛河嘅人其實通常都係好普通。好多男人成日話惹火尤物最吸引，但偏偏自己女朋友一個字都唔符合；好多女人都覺得都敏俊應該係男朋友嘅基本條件，但最後一樣同左個大家叫佢「邊忽俊」嘅男人一齊。點解你會鍾意佢，佢有咩吸引嘅地方，其實知道嘅只有你一個，就算係你好朋友都好，最多都只係話睇得出佢對你唔錯，佢幾肯就你之類。而單單靠依啲行為根本就冇可能令你願意愛上佢，比佢存在喺你心裡面。
　　鍾意同愛嘅分別在於鍾意係果樣野有你喜好嘅特質，好似男人鍾意巨乳，女人鍾意人魚線咁，而男女神通常身上都有大眾都喜愛嘅特點；而愛就係佢就算冇你喜好嘅特點，甚至存在你唔鍾意嘅特質都好，你一樣覺得佢有一種無法解釋嘅吸引力。正如我地外人覺得吳君如係男人，冇女人味都好，喺陳可辛眼中只係代表不拘小節，女中豪傑，而依點正正就係吸引佢嘅地方。陳可辛眼中嘅吳君如同我地眼中嘅吳君如完全唔同，就算佢係一個男人婆都好，佢都係陳可辛心目中獨一無二嘅男人婆。

　　愛情喺一件只有兩位當事人先真正明白嘅事。旁人好鍾意講「都唔明你鍾意佢啲乜」，唔明好正常，因為佢對你黎講先係特別嘅存在，而對其它人黎講佢只係一個唔大波或者冇胸肌嘅普通人。一個能夠存在係自己心入面嘅人絕對冇任何一個人可以代表到佢，因為只有你覺得無可代替嘅人先值得放入只有一個嘅心裡面。每個人心裡都有個乜人？如果硬係要講，其實應該係「每個人心裡都有個只有自己覺得重要無比的普通人」。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/　　
Fanpiece：http://women.fanpiece.com/moyinday/
圖片：http://download.pchome.net/wallpaper/