17落架啦，開心啦？滿意啦？

　　人類總是要犯同樣的錯誤依句唔單止係高達嘅名句，直頭係世界嘅至理明言。好多人鍾意跟風，依排興乜就會一班人衝去玩衝去捧；又有好多人鍾意發明星夢，想一夜成名，想靠名氣靠網絡賺大錢。其實單憑依兩點就可以好肯定17依隻APP遲早會收皮，只係我估唔到會黎得咁快。

　　我部IPHONE有兩隻已經落左架嘅APPS，一隻係Flappy Bird，一隻就係早兩日先下載左嘅17。只可惜下載左個APP之後我都冇咩時間研究下點用，淨係開左個帳號之後就冇再理過（我仲要用左阿寶個頭像，你都咪話唔邪）。結果今朝一起身打開FB就見到佢已經被下架，由係香港紅到上報紙到收皮應該唔超過一個星期，死因就正正係佢突然比太多人識。
　　佢有嘅LIVE功能係吸引嘅地方之一，可以令到好多男人睇到女神嘅真面目。而同時唔知每吸引到幾多人睇你嘅LIVE你就會有錢分，原理同YOUTUBE差唔多，亦都係而家港女必備嘅Instagram所欠缺嘅功能。FB好似都有，但就只限於名人玩。雖然依個功能好吸引，但同時亦都有好大嘅風險：你永遠控制唔到用戶會係LIVE上面播乜。當有錢搵同有名氣依兩個因素一齊出現就會令好多女生想上位做女神順便搵錢，或者係搵錢順手做埋女神。一開始只要有個靚女開LIVE已經可以好受歡迎，到後來觀眾習慣左你就要諗多啲新意，就好似素顏示人咁，但同樣咁樣嘅驚喜都只可以維持好短時間，結果終於到左有人開住LIVE黎自慰「盡地一搏」。而從來最多只會比「17+」年齡限制嘅蘋果又點會再容忍？馬上將你就地正法係可以預期嘅結果。
　　Instagram因為只可以放片同相，同時佢又有審查，就算你放露點相好快你就會被刪相甚至鎖帳；FB亦都係一樣，佢只係比名人玩LIVE嘅原因就係佢知道名人唔會拎自己嘅名氣黎玩，自然唔會做好過火嘅舉動。但17呢？佢完全控制唔到用戶嘅行動，突然間有一個用戶大演春宮騷都好，一萬幾千個人圍觀拍手讚好佢都未必知道。好多野如果私下傳的話其實幾意淫都冇事，好似你喺SKOUT要傳送你既丁丁相比囡囡咁，只要你唔好用黎做頭像就得。正如點解歐聯果排SOPCAST嘅LINK特別難搵同特別易封？因為多左一班忽然球迷，同時佢地又將非法睇波依件事傳得太揚囉。

　　要係互聯網成名最簡單嘅事就係做ON9仔。你唔見劉馬車而家幾咁受歡迎咩？而且好多網站程式禁絕色情暴力，但一定唔會禁止無厘頭白痴低能。如果你喺女的話你要做女神都係影返啲低胸硬照算啦。如果真係想靠扑野賺錢，一係做女優，一係做雞，應該搵得仲多。
一個讚好，是對我的一點支持。
如果想分享給其他朋友的話，請標明出處並附上專頁網址。
https://www.facebook.com/MaoYanDe