辦公室戀情開唔開始好?

毛言地 於 17/07/2017 發表 收藏文章
  人愈大,圈子愈少。除非你外向到四海之內皆兄弟咁樣,唔係嘅話識男女朋友嘅地方可能一隻手數得哂,當中日日都要返嘅辦公室就係一個最大機會嘅地方。有人話喺辦公室見同時嘅時間比見屋企人多:八個鐘加埋OT,基本上你有一半時間都係望住嗰堆同事。日對夜對,日久生情又好,揀無可揀為咗唔變籮底橙又好,總會有人同同事喺埋一齊,但同時又有好多人避忌同咁Close嘅人有進一步關係,畢竟辦公室戀情要諗嘅嘢真係好多。
 
 
  同同事拍拖其實冇乜大不了——前提係如果你地一直咁穩定。一齊返工一齊放工,仲可以時時對住自己愛人其實都幾幸福,不過如果他日情海翻波,朝見口晚見面就成為咗最難受嘅一件事。試諗下你地不歡而散,原因係其中一個有第三者,咁比人飛嗰個肯定唔會想再見到依個「衰人」,但偏偏每日返工就見到佢喺公司出現,真係咩心情都冇哂。特別係同第二個春風得意嘅佢Keep住心情靚靚咁同其他同事細聲講大聲笑,你就會覺得為咗大家好嚟好去而隻字不提佢點玩你嘅自己係幾咁蠢——不過講咗又點吖,咪只會搞到連其他同事都唔想面對,最後得返辭職一條路。
 
 
  可能你地冇分手,一直都相親相愛,但每個人(特別男性)都要喺關係中有一定私人空間,而辦公室戀情最慘就係你做咩都逃唔話對方法眼。由一齊返工到一齊放工,行街睇戲食飯直落,你嘅一舉一動都會比對方見到:你同異性同事傾計會比佢望實,你約其他人會比佢聽住,甚至唔可以扮冇睇WhatsApp所以唔應機,因為佢會直接搵你,依種壓力唔係個個都頂得順。若果你仲係同屋企人住還好,如果你地去到同居依個地步,一日廿四小時,一星期七日都對住,你會覺得難得約到朋友食飯嗰晚係「放監」嘅時候。到時或者係你成世人第一次覺得「冇樓真好」嘅時刻。
 
 
  唔知大家記唔記得父子與驢嘅故事。你做嘅任何事都會比人閒言閒語,依個情況喺辦公室係會無限放大:你同上司一齊係出賣色相求上位,而你追下屬就係以權謀私日後一定會偏心。就算你追個同職級或者唔同部門都可能會比人話從中搵著數,或者比人話你「點解唔搵個好啲」依啲難聽嘅說話。人言可畏,返咗一兩年嘅你應該一早習慣邊個唔在場邊個就會比人講壞話嘅辦公室政治,而兩個一齊咗嘅男女,自然成為咗其他同時茶餘飯後嘅話題。
 
 
  當然啦,愛可以係擋都擋唔住,鍾意起上嚟要一齊都係一個自然動作。不過好在香港轉工都仲係好普遍,「魚唔過塘唔肥」你都應該聽過,就算同咗同事一齊,一兩年後你或者佢轉咗工,大家又成為返一對放工後一齊食個飯再齊齊返屋企嘅情侶,咁就乜煩惱都冇哂啦係咪?
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地  愛情  辦公室  

留言


請按此登錄後留言。未成為會員? 立即註冊
    快捷鍵:←
    快捷鍵:→