當兵唔一定係慘嘅。

　　最近有個男仔做兵做足十年，最後不單止冇修成正果，仲比自己娘娘公開自己兵嘅身份。好多人覺得男人最慘嘅事莫過於此，話哂自己一片丹心付出十年光陰，最後得返嚟嘅只有「冇可能」三個字。你做一位娘娘嘅兵當然好大機會得出以上結果，只不過如果你明白做兵當中嘅技巧識得做一隻風流兵的話，當兵其真冇想像中咁慘，可能仲有意外收獲添。

　　娘娘唔止有一個兵，同時你都可以有唔止一個娘。你可以同時對十個八個娘娘好，喺WhatsApp上面保持同佢地嘅聯絡，唔單止可以做到分散投資嘅效果，你亦唔洗望穿秋水咁得人覆你。我當娘娘一日平均覆你五個WhatsApp，十個娘娘加埋就五十個，依個數目又唔影響你日常生活同工作，又唔會令你太過著緊某個娘娘嘅回覆而進一步失去自己嘅形像同得失娘娘，喺無壓力次下你嘅表現自然會更好。
　　做得兵最想就係陪娘娘出街，只不過通常洗費都會好高，食到貴一貴不特止，分分鐘轉個頭仲要你買個手袋比佢。點解明知會大出血啲兵都肯衝？因為你苦苦等候嘅娘娘揀中你依個機會好難得。個娘娘愈受歡迎，你做兵被選中嘅機會就愈細，依個係好基本嘅概率問題。假如你有嘅娘娘愈多，咁其中一個娘娘會搵你出嚟嘅機會就愈大，機會大唔單止係你多咗同娘娘出嚟嘅可能，你甚至係一隻「有得揀」嘅兵：依個洗費要求太大唔去，嗰個時間唔多啱你又唔去。你唔需要怕得失邊個，一個娘娘冇咗仲有千千萬萬個娘娘，慢慢DQ下啲唔啱你心水嘅，最後總會搵到個時間啱，消費又接受到嘅娘娘做目標。

　　但凡做兵嘅男人最後無非都係想有個機會一親芳澤，或者同娘娘收成正果。當你見到咁多盡本份嘅兵最後都戰死沙場你就應該明白一個男人太早比人收服係唔會有好結果。物以罕為貴，你有嘅娘娘愈少你就會愈珍惜同佢地相處或者WhatsApp嘅機會，底線變得愈嚟愈低甚至唔見埋，任娘娘搓圓㩒扁都毫無怨言，一個咁冇特色嘅男人唔得娘娘正常不過。但當你手上有唔止一個娘娘，你就有本錢同娘娘玩：你可以唔次次順佢意，你甚至可以拒絕返佢轉頭。咁樣當然有風險得罪娘娘，但同時好多女人覺得依種男人先係有主見有個人意願，反而會增加好感。唔好以為事事言聽計從就得，愈得唔到嘅嘢就愈想去得到，依個係人類天性。
　　當你了解到做兵應有嘅玩法，你會發現其實自己同班Playboy差唔多，都可以喺一班女人身邊遊走然後搵機會對準一個目標出擊。兵唔怕做，最緊要做得有回報。當你明白依個道理，其實做兵都真係幾過癮。

一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材