為咗睇波,女朋友都冇面比

毛言地 於 20/06/2018 發表 收藏文章
  「今晚開始,你唔好搵我食飯住。」阿強坐喺茶記,望住食緊蛋牛治做午餐嘅女朋友講。
  「睇波丫嘛,我知。」佢女朋友放低個三文治。「但真係要場場睇咩?啲澳洲對非洲你都要睇埋?」
 
 
  啊強突然覺得講得出澳洲對非洲喺女人嚟講已經好叻,雖然澳洲嗰組其實係冇非洲嘅國家隊。
 
 
  「其實四年一度世界杯除咗睇波,更重要係比我地一班男人四年一度可以聚埋一齊,飲下酒大叫下。試諗下牛朗織女一年先見一次,但我地四年先一聚啊陰公。」
  「但人地一年一日,你一個月喎。」
 
 
  啊強開始後悔搵咗個咁理性嘅女朋友。
 
 
  「一個月定一日都好,平時我對你千依百順冇問題,但依個月嘅假,我拎硬。」啊強狠狠咁食埋最後一啖乾炒牛河。
  「我又冇話唔比你睇波,不過你有時帶埋我去唔得咩?」
  「你同班姐妹下午茶我都唔會嚟啦係咪?」
  「我有叫你架,你唔嚟炸喎。」
 
 
  香港啊強又輸一場。
 
 
  「BB啊。」眼見硬嘅唔得,啊強唯有出埋軟功。「最多我一有時間就搵你下午茶,放假陪你行街行到睇波前一個鐘,睇完請你食餐好嘅。」啊強一路講,一路求神拜佛佢注二百蚊沙特阿拉伯客勝十倍可以贏到,咁荷包就唔洗大出血。
 
 
  「好啦,條件吸引,平時你又表現又好,批准。」啊強女朋友終於拎到批文。
  「幾時都話BB你係最好嘅女朋友。」啊強依句係真心說話,有幾可有女朋友咁善解人意?
 
 
  特別係佢見過一個朋友為咗睇波而同女朋友鬧交分手,又有兄弟比女朋友監禁足一個月,只係比佢睇一場總決賽,佢更加覺得自己好好命。
 
 
  「希望所有球迷都可以咁順利同朋友睇到波就好啦。」啊強心諗。
 
 
  唔洗問我,我冇女朋友。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→