未玩夠,你幾好都冇用。

毛言地 於 08/11/2018 發表 收藏文章
  有時一段感情嘅失敗唔係因為有一方唔夠好,而係另一方未玩夠。
 
 
  無論你有幾好,無論你有幾無微不至,對一個未玩夠嘅人嚟講你只係佢嘅一個過客。感情無分對錯,分手嘅死因可以嚇你一跳:包括你太好令佢有好大壓力、你太細心好似佢啊媽咁、你太乖令佢覺得好悶。就算你有齊所有做個完美老公嘅條件都好,佢想要嘅只係一個可以成日同佢蒲,四圍玩嘅人,長唔長遠根本唔係佢地諗嘅事。
 
 
  要怪,只好怪你喺一個唔適當嘅時間愈到一個你想長相廝守嘅人。
 
 
  當你憧憬住兩個人可以喺柔和嘅陽光下漫步海邊,佢心入面諗嘅係想喺迷幻嘅舞池忘我噉扭動,沉醉喺人間妖域依個愈夜愈精彩嘅地方。你追求長長久久,佢渴望乾柴烈火;你覺得平淡是福,佢鍾意轟轟烈烈。兩個追求嘅嘢都唔同,但兩個都冇錯,分開只係大家Timing真係唔啱。或者係世人眼中你係一個好識照顧對方嘅人,但偏偏對佢嚟講你就只係一個不及喺舞池跳咗兩隻辣身舞嘅陌生人。
 
 
  壞人有市場,係因為佢夠新鮮刺激,仲有大家都係享受當下。
 
 
  或者一夜情吸引嘅地方就係噉,你唔洗諗大家性格啱唔啱,唔洗去考慮將來嘅問題,只需要盡情享受當下嘅歡愉,依點係一個所謂嘅「好男人」永遠唔會比到人嘅感覺。你唔好以為精誠所至就一定會金石為開,遇到一個未玩夠嘅人,除非你肯同佢玩同佢癲,如果唔係你再好都只會落得被分手嘅下場。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday

如果喜歡我們的文章,請即分享到︰

標籤: 毛言地  愛情    情侶  時間  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→