有咩慘得過打波比女朋友大炒?

毛言地 於 24/03/2016 發表 收藏文章
  有邊個男人唔想自己打波叻,一落場就萬眾矚目,個個大叫自己個名,然後一齊高呼MVP?你想,我想,連啊G君都想。但想還想,現實還現實,G君雖然叫有啲波底,但莫講話去打NBA,連打港甲嘅水平都冇,最多得閒同朋友落街場打下波。只不過最令佢頭痕嘅唔係自己打唔成NBA,而係自己女朋友居然仲勁過自己,甚至自己班朋友都偏向同G君女朋友組隊打波,而G君就只可以係場邊睇住大家嘅汗水融為一體,自己就一個人玩電話嘅2K16。

  G君同佢女朋友一樣都係打得分後衛。仲記得一年之前佢女朋友連咩係走步都唔識,G君足足用左幾日解釋包括「點解高比咁勁都要打後衝」之類嘅問題。但而家G君女朋友嘅轉身同假動作已經去到爐火純青嘅地步,住得喺沙田嘅波友都聽過「沙田女高比」依個大名。佢果招後仰跳投每個見識過嘅波友都畢生難忘,佢地話從未試過就算個波已經離開左一個人隻手都好,大家嘅視線仲停留緊喺佢浪下浪下嘅心口度,直到聽到清脆嘅刷網聲,大家先知比人入左兩分。每次完場,大家都會同女高比講句「下次同我再打過吖」,個樣就好似等唔切再輸多一次比佢咁,G君從來未見過一班男人輸左波都咁開心。

  「喂,1ON1吖。」每個星期日,G君女朋友都會挑佢男朋友機。

  「怕你麼?」每個星期日,G君都會接受佢嘅挑戰。然後每個星期日,G君都會舉白旗投降。

  由三分到中投,由插花過人到急停跳投都難唔到女高比,再加埋佢副男人經過都忍唔住望一望嘅身材喺打波果陣因為慣性而造成嘅擺動,G君心諗就算係真嘅高比都未必守得住佢女朋友,特別係當佢轉身擺脫你果下,跟得上嘅只有你嘅視線。有幾次G君甚至比佢FAKE過左之後就開始流鼻血,要放棄比賽。

  隨住擺動嘅停止,今晚佢同女朋友嘅比賽都有左結果:打左三場十三分,比數最近果場都只係六比十三,總數三比零,香港G君又輸一場。

  「多謝哂」

  G君女朋友好開心咁喺G君手中接過支寶礦力--佢地協議左果晚輸左嘅人就要請對方飲嘢,結果G君一請就請左半年。

  「你覺唔覺我打波真係好唔掂?」G君問佢女朋友。
  「唔會啊。」佢女朋友諗都冇諗就答左佢。「話哂都係你教識我打波,我打得咁好,最大功勞都係你。」
  「人生得一如斯女生,死又可憾。」G君企起身,一下公主抱就抱起左佢女朋友。「我地返去開始下半場啦好嘛?」
  「你仲有力咩?」只見G君女朋友面色一紅。
  「依度你贏完我,返到去我贏返你,依半年都係咁架啦。」
  「怕你麼?」G君女朋友應戰。

  每個星期日晚,G君女朋友都會接受佢嘅挑戰。然後每個星期日晚,G君女朋友都會扯哂哮咁投降。

  有時G君會喺度諗,打波比女朋友大炒其實都冇咩所謂吖,係咪?

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/  
Fanpiece:http://women.fanpiece.com/moyinday/
圖片來源:網絡取材,自行加工。
標籤: 毛言地  打波  女朋友  

留言


請按此登錄後留言。未成為會員? 立即註冊
    快捷鍵:←
    快捷鍵:→