《拍拖要長久,首先要珍惜現在》

毛言地 於 25/03/2018 發表 收藏文章
《拍拖要長久,首先要珍惜現在》


  當你搵到命中所愛,自然就會想同佢建立屬於你地兩個人嘅未來,開始去諗結婚啊,買樓生仔等等嘅事。可能你以前都試過兩個人坐喺海邊望住個天,大家諗下結婚要喺邊擺酒或者飛去邊嚟個旅行結婚,之後喺邊度買個單位組織兩個人嘅小天地,然後生返一仔一女就夠哂數。不過嗰陣你地都只係好似發白日夢咁,純粹將自己心入面嘅願景講出嚟,然後幻想下個場景會係點,自High完就算,同而家真係想真真正正為未來做準備係兩回事。
 
 
  做一個有遠見肯計劃未來嘅人係好事,但好多人踏入談婚論嫁嘅階段之後太著重「為未來做好準備」,反而忽略咗同另一半當下嘅生活質素。開口埋口要儲錢要減開支,難得兩個人有假期但最後都只可以喺商場行個圈食個快餐就算,雖然大家都知咁樣係為結婚買樓做打算,但依種完全忽視當下生活質素嘅方法往往會造成唔少磨擦,嚴重甚至會分手收場。
 
 
  香港而家樓貴、擺酒貴,基本上同結婚有關嘅開支每項都好似吸血鬼一樣,要精打細算係無可避免。只不過望一望你身邊嘅嗰一位,大家喺比社會比工作摧殘咁耐之後都希望同最愛一齊嘅時光可以輕鬆,舒服一啲。雖然香港要食好啲的確唔平,但一個月有一次食好少少,容許埋單要收返你一千幾百,等你地可以有一晚能夠享受美食,暫時忘記工作同準備結婚嘅壓力,重新投入浪漫嘅二人世界,依筆錢洗得都係值嘅。再唔係淘寶淘個野餐籃,前一晚兩個人喺廚房夾手夾腳整幾件三文治菠蘿腸仔咁,第二日放假拉個空地草地野餐一樣開心。雖然服務欠奉,但勝在環境滿分,如果你搵到啲隱世少少嘅地方甚至可以包咗個場,唔慌唔二人世界。
 
 
  除咗食,香港又平又正嘅娛樂其實都有。入西貢行下,搭船入三星灣玩下水又可以一日;香港咁多行山徑教育徑,兩個人慢慢行,夾啱時間仲可以欣賞日落;甚至你地決定邊度都唔去,只係大家留喺屋企煲下劇睇下戲一樣可以,只要你地搵到一樣適合你地嘅活動,只要你地仍然可以喺準備未來同時珍惜現在,咁就係一個好嘅拍拖節目。
 
 
  香港人壓力大好正常,特別係當你地要步入人生另一階段前要煩嘅嘢就更加多。但你要記住,你係因為愛你身邊嘅人先會做咁多準備咁多,所以除咗未來,你更加要用現在嘅時光好好對佢,等佢無時無刻都感受到你對佢嘅愛。
 
 
  如果你冇咗佢,仲談乜兩個人嘅未來?

FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday

如果喜歡我們的文章,請即分享到︰

標籤: 毛言地  愛情  真愛  長久  現在  珍惜  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→