《情人節禮物?貴就可以。》

毛言地 於 10/02/2018 發表 收藏文章
  如果你到今日為止都仲煩緊情人節放咩禮物好嘅話,記住一個求恆道理:愈貴愈好。唔好信咩「八大冧死女自製禮物」之類教你低成本靠心思補救嘅嘢,如果你女朋友係中學生大家一個月得幾百蚊零用錢嘅佢可能會鍾意,又或者你本身已經馬雲咁有錢日日送幾廿萬佢洗,到二月十四淨係買排瑞士蓮朱古力比佢都好佢唔會點嬲你,反而驚你有第二個。維繫一般感情要花好多心思,但講到情人節禮物都係現實啲好。
 
 
  對女人嚟講情人節禮物代表乜?係代表一個上網曬命嘅機會。點解平時未見佢種過花但二月十四咁想收男朋友嘅花仲要九十九支?因為可以放上網話比人知男朋友有幾愛自己,咁貴都肯做水魚買花比我。冇錯,情人節禮物當中嘅競爭意義非比尋常,女人當晚最想收到嘅係花、名牌袋、名牌飾物、或者係半島包咗個場嘅浪漫晚餐,總之係放上FB同IG可以招惹羨慕眼光,最起碼都要唔會比人笑嘅水準。你唔洗怕話「送H字頭嘅袋會唔會好行」,只要係名牌,有個盒有個紙袋印住個牌子名,夠佢放上網話比一班人知自己有個男朋友送嘅名牌袋,你依份就係一份好禮物。如果情人節當晚你送本自製相簿比佢,就算你同佢講你整咗幾耐寫咗幾多字排版幾比心機都冇用,因為放上網曬唔到命。唔通讚返你整咗幾耐寫咗幾多字排版幾比心機?萬一班姐妹問幾錢點算?自己男朋友情人節小小錢都唔肯洗,愛極你都有限(對女人嚟講),到時你準備定被分手都得。
 
 
  情人節份禮物唔洗係你女朋友想要,因為佢平時透露過比你知佢鍾意咩嘅話你應該一早送比佢,唔應該拖到大時大節,咁係一個唔愛佢,冷落佢嘅表現(對女人嚟講)。因為女人鍾意嘅嘢可以好平常,一百幾廿蚊有交易,依啲小禮物平時放上FB同IG放小型閃光彈就OK,二月十四大時大節就唔得啦,唔夠睇頭。個牌子愈大愈好,件嘢愈多包裝愈正,最好你食飯訂張檯係近窗邊,望到海景,放埋係窗邊影住份名牌禮物再加束五十支以上嘅玫瑰花,隱約見到開埋支酒,依張就係對女人嚟講最滿意嘅情人節曬命相。你滿足到佢地咁多嘢,夜晚緊係會肯同你曳曳啦,不過時鐘應該好爆,酒店房錢又爆升,你都係望望銀包仲有冇錢,張卡碌爆未先好衝動。
 
 
  你唔好話我好膚淺,情人節本身就係一個咁膚淺嘅節日。你估有情真係飲水飽啊?就算你平時拍拖洗幾小錢都好,依日你點都走唔甩。人地女朋友唔洗男朋友慶祝情人節係條仔三生有幸,係佢好彩佢執到,但依啲只係極例外嘅情況,你唔洗妄想自己做到其中一份子。冇錢?咁你真係考慮自己啱唔啱拍拖啦,特別係喺乜都向錢看嘅香港。
 
 
  你問我準備啲咩?哈,好話啦。
 
 
  我都冇女朋友。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
標籤: 毛言地  情人節  禮物  女朋友    現實  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→