因為Pokemon GO,我行街癲過女朋友。

毛言地 於 06/08/2016 發表 收藏文章
  「今晚不如過銅鑼灣食飯?」O君啱啱落完街跑步,一沖完涼就同女朋友提議過海食飯。

  「又想去維園捉小精靈?你前日先去完喎。」O君個女朋友一眼就睇穿咗佢嘅意圖。

  自從有得捉精靈之後O君就經常提議去唔同地方陪佢女朋友行街食飯。以往O君覺得佢女朋友成日行街仲要一行就幾個鐘好瘋狂,但而家佢自己就每日都會拉埋女朋友出街捉精靈,仲要一捉就捉到凌晨,連佢女朋友都笑佢而家比自己仲鐘意行街。

  「維園多嘢捉嘛,而且你唔係想行下Forever21買衫咩?」
  「你真係咁有我心先好。等等啦,等我整好嘢就出得。」

  雖然O君個女朋友唔玩Pokemon GO,但佢覺得自己男朋友咁熱衷出街都係一件好事,起碼之前想一齊去但O君嫌遠嘅地方同餐廳喺依一個星期已經去咗唔少,而且自己行街試衫果陣O君都會係鋪頭行嚟行去搵精靈,咁就唔洗怕男朋友等到悶而唔敢試多幾件。

  出到銅鑼灣O君冇好似平時咁打開Openrice搵嘢食,O君只係左手拖住女朋友,右手拎住部電話喺條街行,走入平時唔會去嘅橫街搵PokeStop,不過同時都發現到好多因為租金壓力搬入嚟嘅小鋪,同大牌子風格完全唔同嘅衫吸引到O君女朋友嘅眼光,亦令到佢地對已經行咗好多次嘅銅鑼灣有全新嘅印像,唔再只係時代廣場、誠品、SOGO同Forever21。最後佢地喺一間鋪仔食咗個味道唔錯嘅熱狗,飲咗隻未試過嘅啤酒,而喺戰利品方面O君多咗隻奇異花,佢女朋友多咗兩件衫,皆大歡喜。

  時間轉眼間就到九點九。O君冇過到維園捉精靈,而係同佢女朋友去到皇室戲院睇部新上嘅戲,入場之後O君將部電話收埋落袋。

  「唔洗捉精靈啦咩?」O君女朋友問佢。
  「咁拍拖點都要有我地兩個嘅私人時間,唔應該比精靈阻住嘛,係咪先?」O君左手依舊拖實女朋友,而右手就變咗拎住女朋友最鐘意食嘅戲院爆谷。
  「算你啦。」O君女朋友錫咗佢一啖,然後挨喺佢膊頭得部戲開始。

  有人話Pokemon GO會令男女感情缺裂,但其實睇嘅咪又係大家肯唔肯一人讓一步?就好似O君佢地咁,因為依隻Game感情關係反而好咗一樣有可能。準備為Pokemon GO而出門口採索嘅你,不如襯機會帶女朋友去一個以前從來未去過嘅地方,再搵返啱啱拍拖果陣嘅樂趣?

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:鄉民趣味新聞

如果喜歡我們的文章,請即分享到︰

標籤: 毛言地  愛情  Relationship  Pokemon GO  

留言

會員
我要評論
請按此登錄後留言。未成為會員? 立即註冊
  • Cschingbb Cinthia
    Cschingbb Cinthia 於 07/08/2016 評論 NO. 1

    😂😂

快捷鍵:←
快捷鍵:→