男士們，千祈唔好搞錯咩叫溫柔！ 精選 推薦

早前同幾個朋友傾開，點哄番女朋友。一時之間，有人話要道歉、有人話要講得出自己做錯咩、有人話要請佢食野。
七嘴八舌之際，柳臣冷不防講咗一句：「搞笑囉。」
大家停落黎好似望住外星人咁望住我，然後就炸開了。

「好危險架啊！」
「唔得架！佢會話你唔正經！」
「係啊！係啊！佢嬲緊仲引佢笑想死咩！」

於是柳臣突然茅塞頓開，明白點解咁多男士會中招。一般人會點理解溫柔／紳士／努力／搞笑呢啲字眼？
原來好多男士覺得「佢做咗」，就係等於「佢做到」。

佢做咗溫柔體貼既舉動，佢就覺得自己溫柔體貼；
佢做咗紳士既表現，就覺得自己係紳士；
佢搞咗個gag，就覺得自己搞笑。

而做咗同做到係兩件事黎，做咗係自我中心既，只從自己出發，「我做咗啦！」，無顧及女朋友既感受。
咁梗係哄唔番女朋友啦！

但係做到，先係重點。我話「搞笑」可以哄番女朋友，其實全句既完整版係，「搞笑而令到佢笑咗可以哄番女朋友。」你搞完gag佢笑咗出黎，你先為之搞笑，如果唔係「閣下就真係唔荒唔搞笑」。
所以了解呢一點之後，做咩都唔係重點，因為男士們唔係要溫柔／紳士／努力／搞笑，而係要令女方覺得你溫柔／紳士／努力／搞笑。
「令對方感覺到」先係最重要，「感情」「感情」，就係要去「感受」對方既「情」嘛。

就算唔係男女朋友關係，追求異性其實都係同樣道理，少啲諗自己做咗啲咩，多啲睇實際上佢點睇你做既野。
你做好多野，佢唔開心，結果而言你就只係做咗一啲「令佢唔開心既野」。
相反就算你咩都無做，只要佢開心，你就係做咗「令佢開心既野」。
溫柔體貼，不是自己說。