男人有話兒（１２）送番屋企 精選 推薦

送番屋企永遠係一個簡單既浪漫。
事實上，女人根本唔需要你送佢地。因為係佢識到你之前，佢其實係識自己番屋企架！

送番屋企可以分三個階段：
第一，你想送而佢唔俾你送
拍拖之前，女方仲未確定自己心意，呢個時候雖然你想送佢番屋企。但對方多數都遲疑。
係呢個階段，就算男既住荃灣，女既住柴灣，男既都會話順路。因為一個男人想送你番屋企既時候，那怕你話佢聽你住係火星佢都死口話順路。所以當男仔提出送你番屋企既時候，只要女方對男方都有興趣，係完全唔需要考慮對方會唔會住得好遠，會唔會一來一回好辛苦。因為呢，當你地已經係埋一齊既時候，佢就會開始慢慢發現自己八達通成日都要充值。

第二，你想送佢又想你送
拍拖初期男仔多數都唔介意做下保鏢，跟出跟入。因為個時岩岩開始，你地之間大把野可以傾，距離遠啲都唔緊要，反而有時會覺得咁快就到有啲依依不捨添。
無用置疑，呢個階段係你地兩個都最開心既時間。但係維持得幾耐，就好睇個男人係咪真係唔介意長期投放時間同資源係呢件事之上。
亦都好睇個男人幾時醒起：「咦？咁係我同佢拍拖之前，佢係點番屋企架？」
第三，佢想你送而你唔想送
呢個階段，男人開始變得現實。隨住相識既時間愈長，維持浪漫既客觀成本不斷上升。
同時女人完全會在意咗係另一件事上，就係你既改變。對於女人黎講，佢根本睇唔到改變既原因，佢只係留意到你好似變咗。

送番屋企，睇上去好似只係一件好簡單既小事。但往往會左右到一段戀愛既開展同式微。
＝＝＝＝＝＝＝＝＝＝＝＝＝＝＝＝＝＝＝＝＝
喜歡的話不要忘了到柳臣fb page給個like支持一下！